Premier Rhuggenaath: Venezuela ta manera famia, ruman

WILLEMSTAD.-Presidente venezolano Nicolas Maduro a anunsiá ayera ku e ta kla pa drecha relashon ku islanan ABC mesora i den mes rosea a indiká ku ta un diplomátiko merikano ta e motibu di e kiebro den relashon entre Venezuela ku islanan ABC. Gobiernu di Kòrsou, den persona di minister presidènt Eugene Rhuggenaath den un komentario for di Ulanda ta klarifiká ku nunka Kòrsou no a sera frontera ku Venezuela. Naturalmente Kòrsou ta kla pa papia ku Venezuela i asta ta asina ku na algun okashon a buska kontakto pa restablesé e relashon ku Venezuela.

E anunsio di e presidente venezolano ayera a lanta pregunta ta kon bin awor si e presidente venezolano ta asina amikal despues ku den pasado ta e mes a kibra tur relashon ku Kòrsou, Aruba i Boneiru. EXTRA a papia ku premier Rhuggenaath kende  a duna di konosé ku personalmente e ta konsiderá Venezuela mas ku un bisiña. Pa premier Rhuggenaath Venezuela ta mas bien famia i asta ruman.

Sinembargo ta bon pa trese klaridat den e asuntu pa tur hende, den sentido ku nunka Kòrsou a sera frontera ku Venezuela. Ta Venezuela a tuma desishon unilateralmente na dos okashon. Dado momento a inisiá kombersashonnan pa papia riba temanan manera kontrabanda, migrashon, interkambio komersial pa yega na palabrashonnan pa habri frontera. Tabatin vários reunion, pero lamentablemente esakinan no a sigui. Mas aleu premier a bisa ku resientemente el a pidi Direktorado di Relashonnan di Eksterior (DBB) pa aserka Venezuela pa wak si por sinta na mesa atrobe. Pues pa gabinete Rhuggenaath Venezuela ta nos pais bisiña i e pueblo venezolano ta mas ku bisiña, nan ta mas bien famia i ruman. Komo tal, si e deklarashon di presidente Maduro ta nifiká ku lo bolbe kuminsá e kombersashonnan, Kòrsou lo risibí esaki ku brasa habri.