WILLEMSTAD/PARAMARIBO - For di un investigashon di konsumidó di organisashon CoreStats ta resultá ku Kòrsou ta bira mas popular komo destinashon di biahe entre abitantenan di Sürnam. E korant ‘Dagblad van Suriname’ ta skirbí tokante esaki.

Den total 1.282 surinameño di 18 aña i mas a partisipá den e investigashon. Segun e investigashon Kòrsou ta okupá e di tres lugá komo destinashon di biahe preferí ku 13 porshento di tur voto, siguí pa Aruba ku seis porshento. E sifranan aki ta enfatisá e atrakshon di dos isla di parti Karibense di Reino Hulandes pa biaheronan surinameño, segun CoreStats.

Hulanda ta keda e destinashon mas popular ku mas ku binti kuater porshento, siguí pa Merka ku kasi dieskuater porshento, hopi biaha debí na konekshon familiar. Interesante ta ku pais bisiña di Sürnam, manera Brasil, French Guyana i Guyana, ta keda skohe ménos komo destinashon di biahe, ku respektivamente 2,3 porshento, 3,6 porshento i 1,5 porshento.

Manera ta konosí Surnam Airways resientemente a kuminsá bula entre Paramaribo i Kòrsou. Dia 6 di desèmber último Kòrsou i Sürnam a firma un “memorandum of understanding” (MOU) pa yega na un tratado aéreo entre Reino Hulandes i Surinam Airways. A base di e tratado aki Surinam Airways awor ta bula 3 biaha pa siman di Paramaribo pa Miami ku stòp na Aruba i Kòrsou. Dia 18 di desèmber 2023 tabatin buelo inougural di Surinam Airways for di Miami pa Kòrsou. Ku esaki, segun minister Charles Cooper di Tráfiko, Transporte i Planifikashon Urbano, awor tin kompetensia hustu riba ruta pa Miami.  Tambe ta nifiká ku pa abitantenan di Sürnam ta mas fásil pa biahe na Kòrsou òf Aruba.