Anais Arundel Godfried i Tyrone Brunken a kompartí ku nos durante di un di rekorido den Fort Beekenburg. Nan dos huntu a lanta nan mes kompania Tur Tours pa asina por duna guia no solamente na bishitantenan for di afó pero na nos propio hendenan aki na Kòrsou. Hopi biaha nos ta pasa banda di un monumento, un kas históriko i sitionan ku ta atraé sigur e bishitante di afó pero nos mes na Kòrsou no konosé i no sa su historia. Manera nan a bisa Djasabra durante di e enkuentro aki; Tur kaminda na Kòrsou tin kultura, Kòrsou ta un historia riba su mes.

Fort Beekenburg...

Anais a splika Djasabra ku Fort Beekenburg a ser konstruí pa ulandesnan na aña 1701 pa 1703. E temporada ei Direktor Nicolaas van Beek tabatin e poder polítiko na Kòrsou. Pa motibu ku WIC tabata dirigí na Ulanda ainda. E Fòrti a wòrdu konstruí komo un liña di defensa na kosta di Kòrsou pa asina protehé bahia di Santa Ana den Punda.

E fòrti ta lokual ku nos ta yama un 'self defending fort', pa motibu ku e fòrti a wòrdu konstruí di tal manera ku tin diferente opstákulo ku ta hasi difísil pa e enemigu penetrá e fòrti usando forsa brutu.

Tyrone di su parti a splika ku Fort Beekenburg ta un di e hopi monumentonan históriko ku nos tin aki na Kòrsou. E meta di e fòrti tabata pa protehá Caracasbaai, ku e tempu ei tabata un entrada pa Spaanse Water. E fòrti tabata parti di e defensa prinsipal di nos kosta, huntu ku Fort Amsterdam (e promé fòrti di WIC na Kòrsou) i fòrti Sint Michiel. E fòrti tin un historia grandi i importante pa Kòrsou. Ta akinan Pedro Luis Brion a bringa i gana un di su promé batayanan na Kòrsou kontra e inglesnan, i tambe Dr Moises da Costa Gomez a biba aki nan durante su último añanan na bida.

Promové Kòrsou....

Tyrone a skohe pa bira un ‘tourist guide’ ya ku semper el a gusta mustra su amigunan ku ta bishitá Kòrsou "mi isla". ‘Mi tin hopi amor pa Kòrsou i mi meta personal ta di laga kada persona ku bishitá mi sinti loke mi ta sinti, pa asina nan tambe por stima nos isla’. I p'esei ora el a tuma nota di e oportunidat pa e bai e kurso aki, el a haña netamente loke e ta gusta esta promové su dushi isla. Durante e kurso el a siña masha hopi tokante Kòrsou su historia, kultura i naturalesa. Esaki ta buta ku banda di mustra e bunitesa di nos isla, awor e por eduká hende tambe pasó Kòrsou ta hopi mas ku solamente "pòtrèt bunita".

Hopi kos di mira....

Paden di e fòrti tambe por mira un di e renbak nan mas grandi di Kòrsou i paden riba e toren di e fòrti por kontra ku diferente kañon riba garoshi. E fòrti ofisialmente ta un monumento nashonal i pa e motibu aki, tur yu di Kòrsou tin un responsabilidat pa ku kuido i mantenshon di e monumento pa asina e siguiente generashon nan tambe por disfrutá i siña di e fòrti. Den besindario di e fòrti por mira e asina yamá 'kruithuis' i tambe e Quarantaine gebouw. E área ta un área turístiko i rekreativo ku un i tur por hasi uso di dje i tambe kuida tene limpi.

Anais; Si bo sa un tiki di nos historia, ta nifiká ku bo tin amor pa Kòrsou i bo ta bira

realmente e bon yu di Kòrsou i trese e amor aki pa otronan por konosé.

Anais i Tyrone ta terminando e kurso di guia di turista den próksimo simannan. Nan a spesialisá den e área di Caracasbaai, den Dunki na Sòrsaka i e zoutpannen di Jan Thiel pero tur guia di turista mester sa historia di Rif St. Marie, Wiliwood, Bai Class. Tambe Boca Patrick, Cas Pali Mashi, Den paradera serka Dinah Veeris, Punda, un tiki di Otrobanda, e era di segunda guera mundial aki na Kòrsou i hopi mas ku Kòrsou tin di ofresé.

Dikon e yu di Kòrsou tambe....

I si nan tin di bisa nos hendenan na Kòrsou aktualmente pa bin sera konosí ku loke Kòrsou tin di ofresé nan lo bisa asin’aki.

Tyrone; eduká bo mes den Kòrsou su historia pasobra ora bo konosé e historia aki mihó, komo yu di Kòrsou lo bo bai tin mas balor pa Kòrsou pasobra bo ta mira kon Kòrsou a hunga ròl grandi den historia internashonal i asina bo ta wak Kòrsou otro, apresiá Kòrsou mas tantu i pone ku bo ta defendé Kòrsou kontra otro hende. Tyrone no por mira hende tira sushi abou i el a siña su yunan ku un hende ku ta tira sushi abou ta un hende ku no ta stima Kòrsou i e ta haña ku tin hopi hende ku no tin e amor real pa Kòrsou pasobra nan no sa kiko Kòrsou tin. I esun ku por bai ku Tur Tours hasié, mas bo siña di Kòrsou mas lo bo apresiá Kòrsou. ‘Ora nos kuminsá realisá kon grandi nos historia ta, kon bunita nos isla ta, i kiko ta buta ku tur aña tin asina hopi hende ta bishitá Kòrsou i te asta ta konsiderá nos isla un paraiso, mi tin sigur ku nos lo balorá nos isla hopi mas tantu i traha huntu pa nos sigui bai dilanti’.

Anais; Mi ta bisa meskos ku mi ta bisa na tur bishitante. Si bo bin awe i bo a gusta, bai i bin ku bo kasá, yunan tanchi tio madrina i padrino i henter famia. Ora bo siña un generashon, e ta hib’é na e siguiente generashon i asina e ta sigui bai pa tur generashon.

Nos meta ta pa krea un sentido di patriotismo aki na Kòrsou. Ora bo tin amor pa bo patria bo ta kuida bo patria i konosiendo parti di bo historia nos ta yega sigur. I esun ku sa pida di historia di su pais, siña bo yu i trese e yu pa konosé i haña splikashon i sigui krese den historia di su pais. No laga Kòrsou bira djis un isla turístiko. Hopi turista ku ta bin Kòrsou ta bin pasobra nan a tende Kòrsou tin historia, e tin naturalesa, bunitesa. Ora bo subi brùg wak rònt di bo, ta na paraiso nos ta biba i hopi hende ta bin Kòrsou pa wak e paraiso aki, e paraiso ku nos ta ‘tur dia riba dje. Balor’é i e balor ei duna e bishitante tambe ku ta yega nos dushi isla.

Por chèk nan riba Facebook na TurTours