Algun aña pasá a eliminá skol di fishi

WILLEMSTAD.-Pa hopi aña kaba por tende e gritu den komunidat, tantu serka mayornan komo otronan ku ta sinti e nesesidat di profeshonalnan ku ta dominá trabou di fishi. A hopi okashon ministernan enkargá ku labor ta bisa ku tur luna nan mester firma atmishon di hopi ekstranhero pa hasi trabounan ku bou di sirkunstansia normal hendenan lokal mes mester por hasi. Praktikamente no ta haña mèslá, karpinté, ponedó di tegel, pipefitter i vários otro mas.

Resientemente na Boneiru a implementá kambionan den enseñansa despues ku e minister ulandes a tuma nota ku e trabounan di fishi ku hende lokal mes lo por a hasi, tur ta den man di ekstranhero. Relashoná ku esei EXTRA a puntra Miles Mercera, su posishon riba e kambionan nesesario aki.

Na opinion di Mercera, skolnan di fishi ta importante. Echo ta ku aktualmente tin skolnan di fishi kaba na Kòrsou. Mercera ta indiká ku tin diferente skol pa “voorbereidend beroepsonderwijs” i “secundair beroepsonderwijs”, pero e problema ta ku e “eindtermen” ta antikuá i pa kolmo no tin material i método apropiá e skolnan aki no ta prestando.

Mas aleu el a duna di konosé ku tambe por ripará ku hóbennan no ta skohe pa diferente fishi ku si ta disponibel. Hopi di nan ta skohe por ehèmpel pa atministrashon. Mester update “eindtermen” i re-introdusi mas práktika den e skolnan di fishi, ekipá skol i dosente ku fasilidatnan i material, i mehora e sistema di dekano pa asina alumno por skohe mas mihó lokual ku ta pas ku nan.