WILLEMSTAD.- Den e fin di siman ku a pasa Kòrsou a konosé un show di kachó atrobe. E evento aki bou di e título “The Pride Dog Show” a keda organisá ku e intenshon pa lanta bèk e ánimo bou di kriadónan di kachó. Un kantidat relativamente grandi di persona a partisipá den e show aki ku a tuma lugá na Criadero el Hijo de David i nan a presentá tambe ku un variedat di rasa di kachó. Komo parti di e show tambe tabatin demostrashon di kachónan adiestrá ku ta aktua di akuerdo ku e komando ku nan risibí pa ataká. Riba e kombinashon di foto por haña un impreshon di e show. Mester bisa ku esaki tabata djis un komienso, ya ku awor lo bai duna mas informashon riba reglanan ku tin di tene mas kuenta kuné ora ta trata show di kachó. Di parti di EXTRA sigur e tipo di inisiativanan aki ta karga nos sosten, ya ku e ta algu sano unda doño di kachó ta proba su habilidatnan den disiplina di su animal.