Fakansi a kuminsá i e aña aki nos ta dediká atenshon na pasa fakansi na Kòrsou mes tambe. Nos promé invitado ta Emlyn Pietersz ku resientemente a kaba di terminá ku un grupo di kursista pa guia di turista. Emlyn mes tin eksperensia amplio riba e tereno di guia di turista ku rekonosementu internashonal. E ta un di e guianan di turista na Kòrsou ku hopi biaha ta haña na su enkargo gruponan famoso ku ta bishitá nos pais for di eksterior.

 

Kon bin guia di turista…

 

Dia Emlyn a kumpli 18 aña el a disidí ku e ke bira guia di turista. E tempu ei tabatin e kompania Daltino Tours den Punda. El a aserká sr. Martina ku e idea ku e tabatin. Sr. Martina a dun’é un buki pa e siña i despues di 2 siman e mester a bin bèk. Asina Emlyn  a kuminsá guia turista na Kòrsou. Pero sirkunstansianan a pone ku e mester a bai Ulanda kaminda el a studia Editing, komunikashon i tambe turismo. E tempu ei Radio Kòrsou FM a manda buska Emlyn bèk. El a kuminsá traha den prensa pero semper e parti di turismo a keda su debilidat. Segun tempu a pasa Emlyn a bai traha pa un kompania grandi di turismo na Ulanda (awor bou di e number di Atlantis Adventures) i via e kompania ei el a resultá bèk na Kòrsou.

 

 

Turismo krusero….

Asina ei Emlyn a kuminsá siña e parti di turismo krusero. Esei ta un eksperensia masha apart  ya ku tur kos tin di bai masha lihé. Ta algun ora so e turista riba barku ta keda Kòrsou i mester sigui pa otro rumbo i p’esei no tin muchu tempu pa lag’é konosé hopi. Turismo krusero tabata su eksperensia di mas grandi. Na 2010 el a haña un puesto riba e lista mundial ku te ainda e ta ariba. Emlyn ta e entrenadó nashonal di e federashon mundial di guia di turismo. Emlyn tin su propio kompania One Curaçao ku e ta funshoná bou di dje aktualmente.

4 kategoria di turista…

Tur loke Emlyn a siña e ta trese bèk na hóbennan i personanan ku ke bai den e direkshon di guia di turismo. Tur aña  e ta duna entrenamentu básiko na esnan ku tei den turismo kaba komo guiadó i na esnan ku ke siña e trabou aki. Guia di turista ta un siensia. “E gai ku awe ta sinta na New York ta pensa kon e ta bai hinka su fakansi den otro, abo komo guia di turismo tin di hinka bo mes den su mundu pa dun’é loke el a spera ora e bin Kòrsou”, Emlyn a bisa Djasabra. Meskos ku ora e yu di Kòrsou tambe ta bai bishitá otro pais, e ta kuminsá pensa delantá unda e ke bai,

si ta kome so òf si ta drenta un Mall pa otro.  No ta loke abo ke pero e hende ta bin ku otro bista. E ke mira playa, e ke mira kultura, tradishonnan. E hendenan ei bo tin di partinan den 4 kategoria ku ta kara natural, esun respiratorio, muskular, esun digestivo i esun selebral ku ta esun tiki fèrfelu i tiki sientífiko. Despues wak su profil pa dun’é e guia ku ta kuadra kuné.

 

Un pais di selebridat….

Kòrsou ta un pais di selebridatnan, Emlyn a opservá. El a bisa ku Kòrsou tin masha hopi pa ofresé na e turista lokal i esun ku ta bishitá nos di afó.  “Nos tin por ehèmpel lanthùis Morgenster kaminda sede di partido MAN ta, einan ta un siruhano femenino tabata biba di Luxenburg. E echo ku nos hóbennan ta bai Merka pa hunga beisbòl ta pasobra ta sòldánan merikano a siña nos hunga beisbòl aki riba tereno di Maracana banda di Blue Bay. Nos a siña e sòldánan hunga futbòl for di aña 42 i nan a siña nos hunga beisbòl. Bo ta mira ku loke e merikanonan a siña nos a keda bai te awor. Tin selebridat manera Annemarie Braafheid ku a pone e mundu di kámara, video i filmashon e tempu ei traha lusnan special pa hende di koló. I asina nos tin masha kos i lugá  manera tambe e kamber blou entre San Nicolas i Sta. Cruz ku ta den e tòp 5 na mundu”, asina Emlyn a sigui konta.

 

E yu Kòrsou tambe…

Riba nos pregunta kon e yu di Kòrsou ta haña chèns di probechá di e kosnan aki meskos ku esun di afó Emlyn a kontestá ku mester sa si e hende na Kòrsou meskos ku esun na otro pais ke konosé su isla realmente òf e ta kere e konosé kaba. Di otro banda tin hende no ke paga i ta kere ku ta gobièrnu mester paga. Un parti mester komprondé ku na skol mester a duna nan. Pero di otro banda tin hendenan awendia ku si ke paga.

 

Kòrsou no ta solamente  ta pretu, shinishi pero ta tur kolo i tin yu Kòrsou nan di taya ku a disidí kon Kòrsou ta i a disidí esei meskos ku e nativonan Arowak a disidí kon Kòrsou ta awendia.

 

E snoa di mas bieu….

Pa Emlyn ta poko difísil pa bisa kua parti di Kòrsou ta mas dushi pa konta di dje. Esei pasobra banda di e karanan ku el a menshoná, ainda tin bo interesnan ku ta aventurero òf gusta kultura. Den e parti di historia Emlyn ta gusta  e parti hudiu pasobra Kòrsou tin e Snoa di mas bieu den uso konstante di hemisferio wèst. I esei ta inkluí no solamente kontinente Amérika pero tambe e ta parti i ’Greenitch’, parti di Portugal, Spaña i Rusia i Kòrsou tin esun di mas bieu. Esaki a keda disidí pa un korte special na Philadelphia. Pasobra por ehèmpel Barbados a claim ku e tin esun mas bieu i St. Thomas tambe a claim esei. Pero esun di St. Thomas ta mas bieu bou di bandera merikano.

 

Eksito di Kòrsou di awe ta bin di mas di 100 aña pasá…

I asina segun Emlyn por menshoná hopi selebridat mas. Su parti faborito sigur ta e parti hudiu pero tambe e katibunan di e tempu ei ku asta tabatin nan forma di ‘SVB’. E katibu ku fishi tabata haña tereno pa e planta ariba i asta e katibu por a kumpra su libertat (manumishon) loke a pasa hopi na Wilibrordus,

Westpunt, Boka. Ora wak e tres barionan ei bo no por drent’é sin mas pa hasi algu. E ta bai bèk den a siglonan pasá. E éksito di Kòrsou awe te mas di 100 aña kaba asina Emlyn a splika.

 

Balorá bo lugá…

I tur esaki segun Emlyn no ta keda balorá manera mester ta. El a menshoná ku ora bai un Tour ku un famia di Kòrsou i no solamente di desendensia afrikano por mira ku nan no sa di esakinan. “No ta pasobra bo ta wak algu bo sa di dje. Ken por a puntra nan mes dikon Penstraat yama asina….esei pasobra e inglesnan tabata biba einan i tabatin The Pen ku tabata manera un parke di bestia i asina el a bin yama Penstraat. Meskos ku Kindjan…kon bin e yama asina….De Kind van Jan. I asina yen palabra ku a kambia, idioma

 

verbastu esta korumpí. I asina Emlyn a bisa ku e por konta hopi mas di historia di Kòrsou. Hanchi piskadó por ehèmpel ta un pida tereno ku niun di e dos doñonan di tereno no kier a pega na otro i e pida ei a keda sin doño i asina a bira hanchi piskadó pa asina e piskadó por a pasa bai piska. Dikon un pos ta rondó, pasobra si e tin huki e sushi ta bai para den e hukinan ei. I p’esei por wak saku di kamisa i saku di karson ta rondó i no tin huki, esei ta pa sushi no bai para den e hukinan. E guia di turismo ta ‘boost’ bo konosementu general i esei ta loke ta fasiná Emlyn di e trabou aki.

 

 


“Bo mester por tour un 400 biaha pa bo por konosé Kòrsou”.

Tin hopi trabou pa esun ku ke guia turista basta e ta bon organisá. Por ehèmpel a bin un Pir aserka i tin mas trabou pa taksista i esnan ku ke guia. I e konsientisashon bou di lokalnan pa hasi un Tour tambe a krese loke ta hasi nesesario pa tin mas guia di turista, ku bon konosementu i un bon base pa hasi e trabou manera mester ta.

 

Kurso….

One Curaçao ku kooperashon di RedaSosial i tambe ku kooperashon di MEO, asuntunan general i SOAW a organisá un kurso di guia di turista. E kurso aki ta keda organisá tur aña pero ta kostoso. E biaha aki ku e kooperashon di e instansianan menshoná el a bira posibel pa esun ku tabatin mester di un trabou. Ounke mester bisa ku tin rekisitonan pa tene kuenta kuné i ku kada partisipante mester por kumpli kuné. Entre otro loke e turista ta mira ta bo komunikashon ku mester ta bon esta bos, kara, paña i e depósito di selebre tambe mester ta bon. Tin hende por retené informashon pero no por trese dilanti. Ta bin aserka ku bo konosementu general mester ta optimal. Idioma tambe mester ta optimal den e kaso aki ulandes sigur i despues ingles. E turista ulandes oropeo ta gusta Tour i p’esei e idioma ulandes mester ta importante. I si ta turista krusero e eksigensia ta mas ingles. Tur ku a forma parti di e kurso tin nan trabou, sea riba nan mes òf pa un empresa.

 

Importante!!!

Ora ta bai konosé Kòrsou tene kuenta pa tin un sapatu fuerte, tene kuenta ku lo haña otro informashon. Lo bai konosé hopi kos i e lo kosta algu. Tene kuenta ku no ta kosnan ku ta haña bèk. No ta informashonnan ku por Google i haña bèk. Ta estriktamente prohibí pa Emlyn su kursistanan Google. Loke e duna den su lèsnan  ta sertifiká.

 

 

LAGA UN KOMENTARIO

Please enter your comment!
Please enter your name here