WILLEMSTAD.- Pais Kòrsou tin un status nobo i ta hasiendo uso di un eskudo di e époka kolonial komo teritorio insular. Awendia Kòrsou no por identifiká su mes mas ku e eskudo ei i p’esei a start e trayekto pa yega na un emblema outéntiko di pais. Na momentu ku ta bai entamá e proseso pa yega na un emblema nobo pa pais, tin kondishon i reglanan mará na esaki, i tur hende ku ta sinti ku nan tin talento pa por diseñá un emblema nobo pa Kòrsou lo por partisipá pero teniendo kuenta ku e regla i kondishonnan ku tin stipulá. Esei ta loke sr. Jaret Guanipa di e Komishon Emblema Nashonal pa Kòrsou a splika durante un enkuentro ku prensa e siman aki.

E komishon aki a ser lantá ku e meta pa inkluí mas tantu hende posibel. Pero pa esei a saka un aviso pa siudadanonan por a solisitá i bira miembro dje komishon. E komishon aki lo bai stipulá kiko ta e kriterionan a base di kua ta bai selektá e diseñonan ku drenta. Segun sr. Guanipa, tur hende lo por manda nan diseño aden, pero den e preselekshon lo bai skohe 10 diseño ku lo keda presentá na públiko. E públiko lo bai skohe esnan preferí, i finalmente e tòp-3 lo keda presentá na e komishon pa un eskoho final den Konseho di Minister.

Kriterionan:

Algun dje kriterionan ku ta importante ku tin di tene kuenta kuné ta ku e diseño mester ta: simbóliko, balor fundamental, slogan.

El a splika ku, aktualmente loke Kòrsou ta usando ta e eskudo di époka di teritorio insular. Pero nos pais no ta ser rekonosé den dje, ya ku e ta kontené un barku, un palu di apelsina i ku un korona ariba, e ta di e era kolonial. Tur ta símbolonan hulandes. E mester ta algu outéntiko di Kòrsou. Por sierto, for di prinsipio di siglo-18 a abolí eskudo i asina hopi pais na mundu a krea nan emblema. Pero nos tambe aki na Kòrsou ta den un époka nobo i nos lo ke algu ku ta representabel pa siglo-21. Ku diseño di un emblema tin mas libertat den e diseño.

El a enfatisá ku den e kaso aki tur hende lo por partisipá, i esei ta algu ku ta tiki pais na mundu a tuma e kurashi pa hasié.

Próksimamente gobièrnu lo introdusí miembronan di e komishon ku ainda mester keda instituí; tambe lo duna un splikashon amplio di e reglanan; kon ta partisipá; kon ta selektá; i kon pueblo ta bai hasi su eskoho. Pueblo lo tin di wak den kua dje diseñonan e ta rekonosé su mes i kua ta inspir’é mas tantu.

Segun sr. Guanipa, si tur kos kana segun ta programá, pa promé ku fin di aña lo por ta konosí kua a bira e diseño ganadó i e lema nobo pa Pais Kòrsou.