WILLEMSTAD.-Kòrsou tin e playanan di mas bunita ku tin, kada unu ta diferente. Tin hopi pais i isla na mundu ku tin playanan largu ku nan ta yena ku santu blanku, pero hopi di nan ta keda enkantá ku playanan di Kòrsou. Siman pasá un kompania grandi den industria di turismo a duna boka ku masha tempu nan tin bista riba Kòrsou e.o pa e playanan bunita i úniko ku e pais aki tin. Ta di spera ku kada yu di Kòrsou ta sinti nan mes orguyoso di ta yu di Kòrsou.

Esaki ta e bista ku tur hende a topa na e playa públiko Caracasbaai. Un porkeria kompletu! Hendenan a kaba ku nan selebrashon djabièrnè anochi, apesar ku tin prohibishon di aglomerashon di hende pa evitá ku ta sigui plama vírus di Corona. E eksperto lokal dr. Gerstenbluth ta konsehá, ta pidi i ta roga pa kuida kurpa. E ta splika manera ta papia ku mucha chikitu dikon evitá aglomerashon i ambiente ku alkohòl. Opviamente tin hende no tin kunes i no ta preokupá, sinembargo no tin niun argumento pa hende laga nos playanan ni niun otro sitio asina aki. No ta korekto tampoko pa para mira hende ta kousa destrukshon di e forma aki. Asin’aki playa mester ta liber, pa sigui hasi e porkeria aki? Hendenan boluntario ta bai limpia, pero ta asina aki mester sigui?