WILLEMSTAD.-Informashon ku EXTRA ta dispone di dje ta indiká ku korte di hustisia na Ulanda a dikta sentensia den e kaso ku Kas di Kòrsou a entamá kontra e benta di edifisionan ku eks minister plenipotensiario Marvelyne Wiels a realisá den su tempu komo mandatario. Korte a dikta ku Kas di Kòrsou tabatin rason di anulá e benta di e edifisionan di Kas di Kòrsou i tambe a anulá e but ku a yega kasi 6.5 mion florin ku a trata na kobra Kas di Kòrsou.

Aña pasa gobièrnu di Kòrsou, pa medio di minister plenipotensiario Begina a anulá e benta di e edifisionan ku ta e ofisina na Badhuisweg 173 i 175, i e kas unda e minister plenipotensiario ta biba ku ta na Wagenaarsweg 3. Awe korte a dikta ku Kas di Kòrsou ta keda ku su edifisionan. Na 2014 tempu di gabinete Asjes a disidí na bende e edifisionan pasobra mantenshon lo kosta demasiado, pero no a konsulta Parlamento manera lei ta stipulá. Pero komo ku ya kaba sra. Wiels a pasa palabra ku e kumpradónan, na 2015, esakinan a menasá di bai korte pa eksigí ku e benta ta sigui. Taksashon di e edifisionan ta mustra ku ta trata di un balor di 4.7 mion euro pero e dil ku sra. Wiels a sera ku e kumpradónan ta di 2.7 mion euro, pues 2 mion euro ménos.

E kumpradónan a laga imponé un but di 9 mil euro pa dia, pa kada dia ku e benta no sigui. E but ei a alkansá un suma di 6.5 mion florin entretantu, pero den e desishon di korte di awe a bari e but tambe for di mesa.

Parlamento

Den debate ku a tuma lugá den Parlamento riba e tema aki, na sèptèmber 2017, di forma unánime a bai di akuerdo pa no sigui ku e dil ku sra. Wiels a hasi. Parlamentario Cooper e tempu ei a papia di un “rip off” ku a tuma lugá.