Banko Sentral un bia a gana kaso kontra Parman Group

WILLEMSTAD.-Un ratu pasa korte di hustisia den un veredikto a rechasá petishon di Parman Group di Hushang Ansary  den kua a pidi korte pa eksigí di Banko Sentral pa stòp e areglo di emergensia riba e kompanianan di ENNIA. Parman mester kubri e gastunan di e kaso i e veredikto ta drenta na vigor mesora.

Manera EXTRA a informá den algun okashon, Ansary ku ta doño di e kompania Parman International ku ta doño di e grupo di kompanianan ENNIA a entamá un kaso den korte pa revoká e desishon anterior di korte di 6 di yüli 2018 den kua Banko Sentral di Kòrsou i St.Maarten a pidi i haña outorisashon di korte pa pone kompanianan do ENNIA i tur kompania supsidiario di ENNIA bou di un areglo di emergensia. Esei a nifiká ku Banko Sentral a haña outorisashon pa pone un banda hinter e gerensia di ENNIA, ku eksepshon di un persona, i tambe a kore ku hinter e hunta di komisario di e kompanianan di ENNIA.

Banko Sentral a bai korte na Merka tambe i pidi pa haña mesun outoridat aki na Merka riba kuentanan di ENNIA na e banko merikano Merril Lynch. Esaki tambe a keda honra pa korte merikano dia 20 di desèmber 2018. Ansary na su turno a bai korte i eksigí pa Banko Sentral lanta e areglo di emergensia i bai mesa ku Parman Group. Wes a rechasá tur e eksigensianan di Ansary i Parman. Ku otro palabra Banko Sentral por sigui hasi esfuerso pa garantisá i kuida plakanan di ENNIA na benefisio di tur e klientenan ku tin nan penshun i otro seguronan na e kompanianan di ENNIA. Mas detaye den edishon di EXTRA.