WILLEMSTAD.-  Fiskal i hues ayera a bai di akuerdo ku abogado mr Wilsoe pa duna e hóben G.S. (23) kastigu kondishonal. G.S. ta keda  akusá di a trata na eksportá 354 gram di koka dia 13 di sèptèmber último.

G.S. ayera a presentá ku su mayornan, frei i tambe un amigu den sala di korte.

Hues a haña esaki un bon sosten pa ku e hóben.

Segun e prosèsverbal, e akusado a trata na eksportá e droga den 2 tubu di krema pa uso ku tabata den su maleta. El a atmití su kulpa i a bisa ku e ta lamentá ku el a kometé e akto, desepshonando su famia i amistades nan.

El a splika ku e ta studiando ICT na Merka.  E tin un debe di 5 mil florin pa paga i loke e ta haña na SSC no ta yega. Si e no paga e debe e lo no por sigui haña su lèsnan.

El a bin Kòrsou i pa motibu di COVID no por a bai bèk. Na Mambo el a konosé un mucha hòmber  i nan a papia basta largu riba tur tipo di tópiko. Entre nan ku e tin su frei na Hulanda i kier a pidié pa nan kasa. Tambe el a kont’e di e debe ku e tin na Merka  ku por strob’é sigui su estudio.

Despues di a skuch’é, e gai a bis’é ku e por yud’é ofresiendo pa e pasa droga pe kontra di un pago di mas o ménos 4 mil euro.

Na Hato duana a tene un kontròl riba su maleta i a haña ku e dos tubunan tabata demasiado pisá.

Esei a pone ku nan a zag e materialnan i a saka 2 saku ku tabata kontené e droga na pasta.

Fiskal a bisa ku na duana e akusado a hasi uso di su derechi keda ketu, pero e ta apresiá ku el a presentá i a konta kon e kosnan a bai. Segun fiskal, esaki sigur lo ta na fabor di e akusado.

Fiskal a bisa ku normal e kastigu pa e kantidat di e droga ei lo tabata 12 luna di kual 6 kondishonal, pero e ta tene kuenta ku e akusado a atmití su kulpa, e ta un studiante i ta promé bia ku el a hañ’é den man di hustisia. Fiskal ta di opinion ku e akusado meresé un chèns.

Mirando esaki fiskal a yega na un demanda di 12 luna  kompletamente kondishonal, mas 240 ora di trabou pa e sinti ku el a hasi robes.

Hues Snitker den su desishon a desviá for di e demanda di fiskal. Hues a bisa ku e ta tene na kuenta ku e akusado ta un hóben ku kisas no a pensa riba e konsekuensianan. Hues a bisa ku e ta dun’é un chèns ku e tin ku gara ku dos man. Mirando tur esakinan hues a yega na un kondena di 6 luna kondishonal mas 180 ora di trabou pa komunidat  ku un periodo di prueba di 3 aña.