SBO mester paga hür atrasá

WILLEMSTAD.-Korte a dikta sentensia den e kaso di Fundashon Kas Popular (FKP) kontra Sentro di Bario Otrobanda (SBO). Den e kaso aki FKP ta eksigí di SBO pago di debe di hür atrasá, miéntras ku SBO ta pidi pa wes eksonerá e debe ku a bira asina grandi ku e organisashon di bario no por karg’e mas.

SBO ta un fundashon ku a keda lantá na 1992 ku e meta pa promove desaroyo general, spiritual i sosial bou di abitantenan di Otrobanda i besindario. FKP ta un fundashon di gobièrnu enkargá ku maneho di bibienda popular. Partidonan a sera un akuerdo di hür (1992 – 1997) pa e edifisio na Sint Martinsweg 1. Ta usa  e edifisio komo sentro di bario. Kada dos aña ta prolongá e akuerdo di hür. E hür ta Nafl 2800 pa luna. SBO no ta kumpli ku pago di hür na FKP i apesar di hopi intento di FKP nunka no a logra ku SBO ta kumpli ku e debe.

Den e kaso di korte FKP  pidi pa kibra e kontrakt ku SBO i tambe pa eksigí ku e sentro di bario ta sali for di e edifisio. E debe a akumulá te febrüari 2023 na un suma di Nafl 772.700. E montante asina grandi di debe atrasá ta hustifiká pa kibra e kontrakt.

SBO di nan banda a trese dilanti ku nan ta pensa ku e debe a bira bieu (verjaard). Tambe SBO ta indiká ku na vários okashon nan a trata na yega na un areglo ku FKP debí ku komo organisashon non-profit nan no por paga e suma di hür. Nan a aserka SOAW pa haña yudansa i ta pendiente. E fundashon ta mustra ku si SBO kai afó esaki lo por tin konsekuensianan serio pa e bario. Finalmente SBO a pidi korte pa kanselá/pordoná e debe na FKP.

Den su desishon korte ta ordená SBO pa paga e debe atras di hür te febrüari 2023.

FKP a pidi pago di hür pa e periodo promé ku aña 2000 te febrüari 2023. FKP no a kuestioná ku SBO a argumentá ku e debe a pasa su tempu i pesei korte ta bai di akuerdo ku argumento di SBO te febrüari 2018.  Echo ta ku SBO no a kumpli ku pago di hür pa loke a trata e periodo febrüari 2018 te 2023.

Korte a dikta ku ta kibra e kontrakt di hür entre e partidonan i ta ordená SBO pa dentro di seis luna bandoná e edifisio na Sint Martinsweg 1 i entrega e edifisio bashí bek. SBO mester paga e debe di hür di febrüari 2018 pa 2023. Tambe SBO mester paga e hür di febrüari 2023 te ora sali for di e edifisio.

SBO mester karga ku e gastunan di e proseso na balor di Nafl 7831,45