WILLEMSTAD.- Manera ta konosí, hues na Kòrsou den luna di ougùstùs 2019 a disidí ku gobièrnu di Kòrsou tin e obligashon pa sòru ku refineria ta kumpli ku e normanan di medio ambiente moderno. Esaki tabata sentensia di un kaso ku Clean Air Everywhere a entamá kontra gobièrnu di Kòrsou relashoná ku refineria.
Gobièrnu no tabata di akuerdo ku desishon di hues i a bai den apelashon. Tabata plania ku korte a duna sentensia dia 12 di yanüari awor. Presidente di SMOC Peter van Leeuwen, ku ta sostené e kaso di Clean Air Everywhere, djamars a duna di konosé ku korte a posponé e sentensia te 9 di febrüari.
Van Leeuwen algun dia pasá a manda un komunidat tokante e sentensia. Esaki tabatin di aber ku e konsorsio nobo CORC BV. SMOC durante e wikènt a reakshoná riba e promé komunikado di prensa ku e konsorsio CORC a manda djabièrnè último. Esaki no a kai den bon tera ku e organisashon pa medio ambiente SMOC. ‘Si CORC ta habri e refineria bèk nan tin ku kumpli fo’i kuminsamentu ku normanan di medio ambiente moderno’, SMOC ta bisa. Segun SMOC e konsorsio a duna di konosé ku nan ke gradualmente mehorá kondishonnan ambiental. SMOC no ta di akuerdo ku esaki. Segun nan hues na Kòrsou a disidí den luna di ougùstùs 2019 ku gobièrnu di Kòrsou tin e obligashon pa sòru ku refineria ta kumpli ku e normanan di medio ambiente moderno. Van Leeuwen djaluna na radio Paradise FM a bisa ku e ta ferwagt ku Korto lo no kambia e sentensia ku wes a duna. E ta ferwagt ku Korte tambe lo bisa ku gobièrnu tin ku sòru ku e doño nobo di refineria lo sigui reglanan internashonal di medio ambiente
Manera ta konosí CORC B.V. Oil Refinery Complex OIL djabièrnè último a partisipá ku Refineria di Kòrsou a invitá CORC pa negoshá di forma eksklusivo tokante un akuerdo definitivo, pa CORC tuma riba dje operashon di Refineria Isla, e fasilidatnan di e haf na Emmastad i di e Terminal na Bullenbaai.
Segun SMOC doño nobo di refineria ‘no por kuminsá intoksiká abitantenan ku ta biba bou di huma di refineria, meskos ku PdVSA a hasi pa hopi aña.’ SMOC: ‘Nos lo no tolerá esaki.’