WILLEMSTAD.- Korte a trata djárason 1.700 kaso di but, asina yamá oproepings-proces verbaal (opv). E kantidat tabata mas haltu ku normalmente sa ta e kaso pa motibu ku den luna di yüli lo no ta bai tin tratamentu di kasonan den tráfiko.  Ministerio Públiko ta atvertí ku kontrolnan sinembargo di polis ta kontinuá.

Polis kontrolando 37 hende riba nan komportashon

Desde ougùstùs 2017 a bira maneho pa bai Korte ku outomobilistanan residivista ora ku gara nan ta kore outo sin un reibeweis bálido. Ta nifiká ku OM ta hasi na wes un demanda pa un kastigu kondishonal di prisòn, pa di e forma aki kambia e komportashon den tráfiko. Na e momentunan aki 37 persona ya kaba a risibí un kastigu kondishonal i ta riba un lista di polis pa keda vigilá riba nan komportashon.

Djárason 27 di yüni 2018 den Korte di kasonan den tráfiko a presentá atrobe e sospechoso R.M.M. pa kore outo sin reibeweis. El a risibí di wes un kastigu di prisòn di 3 siman i un temporada di prueba di 2 aña. Wes, riba demanda di Fiskal di OM, ta manda e persona aki awor 3 siman den prisòn pa sinta su kastigu komo residivista. E maneho aki, konforme Fiskal, ta eksitoso. Pa e persona aki lo krea un lugá den prisòn pa e sinta su kastigu.

No ménos ku 5 ekstranhero kastigá pa kore outo bou di influensia  

E hòmber L.I.P. (St. Lucia, 1972) a keda sentensiá djárason “bij verstek”. E no a presentá den Korte pero a hañ’é kulpabel di a kousa un aksidente grave riba Caracasbaaiweg dia 4 sèptèmber 2015 na momentu ku el a kita for di su banda di kaya i resultá den roi. Esaki a resultá den dos dama herida. El a risibí un kondena di 3 luna di prisòn i tin ku paga e damanan un daño perhuisio ku a keda demandá. Tambe e ta pèrdè su reibeweis pa 1 aña. OM ta buskando L.I.P pa esaki por sinta su kastigu.

Djárason a trata tambe vários persona ku a kore bou di influensia di alkohòl i a kousa aksidente miéntras ku nan tabata intoksiká. E hòmber G.T.G. (Spaña, 1987) a risibí e but mas haltu di 750 florin pa kore intoksiká dia 17 di mart 2018 riba Cubaweg. Tambe e tin ku paga 1.250 florin pa kore peligroso. Loke tambe a hunga un riol den su kaso ta ku el a sigui kore bai despues di a kousa e aksidente. Tambe Wes a ordená pa e paga un daño perhuisio na un víktima di e aksidente.

E dama I.J.C.M. (Colombia, 1981) a risibí un but di 750 florin, di kual 250 florin kondishonal i un temporada di prueba di 2 aña pa kore intoksiká dia 5 di mart 2018 riba Winston Churchillweg. El a risibí tambe un but di 300 florin pa a kore peligroso pa motibu ku el a pèrdè kontrol i a dal kontra un waya di kura i un palu. E hòmber R.A.B.N. (Colombia, 1953) a risibí but di 750 i 250 florin pa kore fuma i kousa un aksidente dia 27 di yanüari 2018 riba kaya públiko den bario di Julian. E hòmber V.P. (Haiti, 1969) a risibí 2 but di kada un 250 florin pa kore dor di lus kòrá dia 1 di aprel 2018 riba Schottegatweg-noord (krusada Winston Churchilweg). Tambe el a kore peligroso i kousa un aksidente. Komo último e hòmber S.R. (Kòrsou, 1996) a risibí 2 but di kada un 250 florin pa kore dor di lus kòrá i kore peligroso riba Schottegatweg dia 23 di aprel 2018.

Wes no ta pordoná ora parker dilanti The Movies

Tambe Wes a duna su veredikto den algun kaso na unda shofùrnan di outo a parker robes. Entre otro dilanti The Movies na Waaigat. Wes a haña mas ku sufisiente prueba ku no mag parker einan. Tin bòrchi ku ta indiká esaki ora bo baha brùg Juliana i lora bai The Movies.  Tambe a konfirmá but pa outomobilistanan ku a parker riba alsera den sentro di siudat di Punda. Wes a haña probá ku e alsera ta pa peaton, i no pa outo pa parker sin mas.