WLLEMSTAD.- Un ratu pasá e bosero di Ministerio Públiko, Norman Serphos a anunsiá ku korte a tuma e desishon pa wanta ku tratamentu di e kaso kontra e bankero Eric Garcia. Segun Serphos, djabièrnè awor 14 di sèptèmber 2018, korte lo anunsiá kua ta bira e fecha nobo riba kua lo trata e kaso kontra Garcia. No a informá kiko tabata e konsiderashonnan òf motibu pa kiko korte a wanta e kaso.

Anteriormente OM a anunsiá ku djabièrnè awor 14 di sèptèmber lo tin tratamentu di e kaso kontra di e bankero lokal. Ta sospecha Garcia e.o di malversashon di un suma grandi di plaka, labamentu di plaka i falsifikashon di dokumento na momentu ku e tabata kuratòr den faillisement di Banco de Maracaibo. E kaso aki ya kaba a bin Korte den forma di pro-forma i regiezitting. Djabièrnè awor na lugá di trata e kaso den su kontenido wes lo bai indiká kua ta bira e fecha nobo pa tratamentu di e kaso.