WILLEMSTAD.- Korte di apelashon di ámtenar a destruí un desishon di gobièrnu pa duna retiro inmediato na un empleado di DOS (Dienst Openbare Scholen), pasobra e no a reanudá su trabou despues di tabata malu. E trahadó aki tabata kanando su kaminda pa e por atendé su retiro pero komo un hende ku ta inkapas pa por laborá.

E trahadó for di 2016 ta malu (AO) debí na keho di su pia. Dòkter di ARBO Consult durante di kontròl periódiko a konstatá ku e trahadó di AO di 30 yüni 2020, i ku dia 10 yüli 2020  por kuminsá traha. Pero faltando kuater dia promé e kuminsá traha, e trahadó no a entregá su karta di por traha na su hefe pasobra e tabatin algun remarke i preguntanan. E trahadó kier a bai kontrolá den eksterior, pero no a  hasi esaki. Tambe el a spera ku ora e bai su dòkter ortopédiko, e lo por a bai traha mitar dia so, pero na otro skol, esei tampoko a sosodé. Ademas e trahadó lo mester a bolbe serka e dòkter ortopédiko pa saka  foto. P’esei el a manda puntra e dòkter di ARBO kiko e tin di hasi ku e deklarashon pa bai traha dia 10 yüli.

Ademas e trahadó a aserká APC pa tuma informashon di su situashon finansiero den kaso si e mester keda di “kùr af” pa sigui laborá, esta e no ta den kapasidat pa por laborá mas.

Den luna di mart di 2022, e trahadó ta aserka DOS kaminda ta pidi pa por deklar’é inkapas pa por traha. Pero DOS ta indiká na e trahadó ku e tin di manda karta na APC tokante e asuntu aki.

Despues ta sigui un bai bin di karta entre e trahadó i DOS, i un dado momentu DOS ta informá  e trahadó ku e tin di regresá trabou. E trahadó ta entrega DOS karta di su dòkter di kas, indikando ku el a haña covid i ku e tin keho ainda, pa DOS esaki no ta konta, i pa entrante 1e di òktober 2022 a retirá e trahadó pasombra e no a kumpli ku e yamada pa reanudá su trabou. Korte di promé instansia ta duna DOS rason den su desishon, i e trahadó a pèrdè e kaso. E trahadó ta apelá e desishon aki i a haña rason serka tres wes. Wesnan a studia e kaso i a duna e trahadó rason i a trese dilanti ku no tin prueba konvisente ku e trahadó por a reanudá su trabou promé i despues di 10 yüli 2020. P’esei no por deskartá e posibilidat ku e trahadó ta bini na remarke pa haña retiro di ta inkapas pa traha. P’esei e wesnan di korte di apelashon no ta mira motibu ku DOS mester a tuma desishon di retiro pasobra e trahadó lo a keda sin presentá na trabou. E wesnan ta duna e trahadó rason den su opheshon kontra di e retiro. Gobièrnu tin di paga gastunan di e trahadó den e proseso aki tambe na un suma di 2800 florin.