WILLEMSTAD.- Fiskal a pidi korte pa kondená e akusado Z.M. (36) na kastigu kondishonal pa intento di trafikashon di droga, pa asina evitá ku e ta kai será i pèrdè su trabou.

Z.M. ta keda akusá di a trata na eksportá un kantidat di 762 gram di koka pa Europa.

El a presentá den sala di korte pa asumí su responsabilidat.

Na polis el a akseptá su kulpa. Segun e akusado, e ta tata di 4 yu i e ta esun ku ta sòru pa nan.

Segun e prosèsverbal, e akusado a wòrdu kontrolá, na momento ku e tabata bai subi avion rumbo pa tera friu.

Durante kontròl e personal di duana, a fula algu duru na rant di e djins ku e akusado tabatin bistí.

Na e momento ei, e personal di duana a konstatá un parti ku tabata dòbel na rant di e djins di e akusado.

A resultá ku tabatin e koka na pasta den saku di plèstik den e banda di djins.

E akusado a akseptá ku e tabata sa ku ta droga e tabata transportando.

El a bisa di a haña esaki serka algun hende ku e konosé ora ku el a konta nan su problema, pero e lo no menshoná nan nòmber.

Segun e akusado, na momento ku el a yega Hulanda, e lo a haña su pago. Nan no a bis’é kuantu delantá.

E akusado a indiká ku aworakí e tin un trabou i ku e no ke pèrdè esaki.

Fiskal a bisa ku normalmente  e kastigu pa e kantidat di droga aki lo tabata 18 luna di kual 9 kondishonal, ku un periodo di 3 aña di prueba.

Segun fiskal, e ta desviá for di e liña i ta duna e akusado un chèns mirando ku awor e tin trabou.

Mirando esaki fiskal ta hasi un demanda di 12 luna kompletamente kondishonal  ku un periodo di prueba di 3 aña mas 200 ora di trabou pa komunidat.

Fiskal a bisa e akusado pa tuma esaki komo un atvertensia serio, paso lo no bai tin mas chèns.

Hues den su demanda ta bai kompletamente di akuerdo ku e demanda di fiskal.