WILLEMSTAD.- Korte di promé instansia a bai di akuerdo ku abogado Larmonie pa posponé kaso di e asesinato ku a tuma lugá den kaya Neblina na seri Papaya dia 6 di yanüari 2020.
E hóben Xiomar Winklaar di apénas 21 aña ta keda akusá di a tira e víktima Jahier Rudolph Evertsz, nasé na Kòrsou 13 di yanüari 1990 mata. Segun e abogado djis algun ratu promé ku e kaso keda trata, el a haña rapòrt di sikiater ku ta bisa ku e mester kaba di hasi algun opservashon riba e akusado.
E abogado a bisa ku esaki por ta di gran importansia den e kaso aki. Den e rapòrt e sikiater a duna di konosé ku lo bai manda e hóben den e departamento di Foba, kaminda lo bai opserv’é pa 2 luna. Esaki despues ku e sikiater a opserv’é a base di estudio preliminar.
Mirando tur esakinan abogado Larmonie ta pidi pa posponé e kaso te ora e rapòrt di sikiater keda kla.
E kaso a keda posponé pa dia 9 di yüni benidero pa mitar di 10 di mainta.