Ta trata kaso korupshon pa buska partner stratégiko pa refineria

WILLEMSTAD.- Korte di Kasashon na Hulanda a konfirmá kondena pa e akusadonan den kaso di korupshon Lacerta. Nan a ofresé miónes bou di mesa pa privilegiá un partner stratégiko pa bai operá refineria.

Korte di Kasashon no a mira ningun motibu pa destruí e sentensianan ku a kai den Korte di Apelashon pa nan, i pues ta kondená nan konforme e kastigu den korte di apelashon.

Den e kaso Lacerta mihó konosí komo RdK esnan kondená ta  Gilbert Cijntje, Michelle Kinburn, Ashley Isidora i èks direktor di Rdk Roderick van Kwartel. Manera indiká Korte di Kasashon tabata hopi korto den su desishon. Den luna di yüli di e aña aki, PG a pidi korte di Kasashon pa kondená e akusadonan konforme sentensia di Korte di Apelashon na Kòrsou.

Den Korte di Apelashon, tres wes a trese dilanti loke ku nan ta pensa di e kuarteto akusado den e kaso aki: van Kwartel, e tribunal di Hof a bisa den e veredikto, ku komo direktor di RdK, e akusado a keda apuntá pa buska un partner stratégiko pa RdK. E akusado huntu ku su ko akusadonan, a aserka un kandidato fuerte  i a pidi un suma mionario bou di mesa pa privilegi’é pa operá refineria na yanüari 2020.  Segun e veredikto, tabata trata di un kandidato serio ku tabata negoshando ofertanan ku a keda presentá, pero despues di e aserkamentu di e grupo, a spanta i a hala atras i bisa ku e no ke tin nada di aber mas ku e refineria di Kòrsou, strobando ku por a haña e partner stratégiko aki, ku tur e konsekuensianan ku a trese kuné.

E tribunal a bisa den e veredikto ku komo empleadonan públiko i trahadó di RDK, e akusadonan a hasi mal uso di nan posishon, pa asina favoresé nan propio saku finansieramente, en bes di interesnan di pais Kòrsou i  su siudadanonan.  Esaki a bai a base di e kuestion di e prosedura pa yega na un partner stratégiko nobo, pa e refineria ku tabatin interes di pais ku tabata di sumo importansia.

Den e veredikto, hues a sigui bisa ku e akusadonan a tacha e konfiansa, ku otronan a hinka den nan.  Hof ta di akuerdo, ku e publisidat di e skandal di soborno, a trese daño serio na imágen di Kòrsou ku por pone invershonistanan ku ke invertí den futuro, spanta pa hasi negoshi ku nos pais. Tambe e sistema kon e akusadonan a negoshá, por tin influensia kompleto riba e komunidat.  Hof a haña ku e echonan ku a keda probá ta asina grave, ku solamente kastigu inkondishonal ta kuadra pa e akusadonan, ku tabatin funshonnan haltu.

Pa loke ta trata Isidora e veredikto di Hof a bisa ku e loke el a deklará den korte di apelashon, ku el a keda aserka pa Van Kwatel pa hasi e trabou di “consultant” eksterno i no tin niun kontribushon intelektual na e proposishonnan, pero solamente a konfia riba e integridat di Van Kwartel, no kreibel. Mirando tur esakinan Hof a haña Cijntje, Iisidora i Kinburn kulpabel pa soborno i a kondená nan na 30 luna di prizòn i van Kwatel mirando su poseshon di direktor i ku e mester tabata sa mihó, na 36 luna di prizòn. E mesun kondenanan aki a keda konfirmá pa Korte di Kasashon.