Organisashon HiMA ta kontentu ku e desishon

WILLEMSTAD.- Korte na Hulanda e siman aki a prohibí kompanianan di awa, manera Dunea i PWN, pa nunka mas kòrta awa na famianan ku mucha, ainda ku nan no paga nan kuentanan. Wes tambe a bisa ku e kompanianan mester habri awa bek na famia ku mucha. Esei a wòrdu determiná dor Korte na Den Haag djamars 19 di Mart. Segun e hues, si kompanianan no ta habri awa bek, e gobièrnu i e kompanianan di awa ta violá derecho di mucha. E gobièrnu mester tuma medidanan pa evitá ku muchanan na Hulanda ta keda sin awa.
Kuater aña pasa organisashon di derechinan di mucha ‘Defence for Children’ i abogadonan di derechi humano di Nederlands Juristen Comité (NJCM), a kuminsá ku e lucha na Hulanda. Organisashon na Kòrsou, Hende-i-Medio-Ambiente (HiMA), ta hopi kontentu ku e desishon aki, asina Yvonne Wolthuis-Olf di HiMA ta bisa.
Manera ta konosí HiMA ta luchando pa basta aña kaba pa tur hende, i mucha, na Kòrsou tin akseso na awa.
HiMA a bai korte na 2022 pasobra durante bishita na kas, inkluso esnan ku a ser hasí ku inspektor di polis Glendon Aniceta, direktiva i miembronan a keda konfrontá hopi bia ku hopi seramentu di awa na Kòrsou. HiMA a pidi wes pa prohibí kompanianan pa kòrta awa na famia ku mucha, pero wes na Kòrsou de luna di yanüari último a rechasá e demandanan.

E sentensia na Hulanda a sigui e desishon di aprel 2022 unda hues a bisa ku hende en bèrdat tin derecho na awa, pero ku e derecho ei no ta apsoluto, esaki ta nifiká ku nan por ser limitá. Segun e organisashonnan di derechinan humano, esei no ta nifiká ku e práktika di kòrta na Hulanda ta legítimo. E outoridatnan i kompanianan di awa ta kòrta muchanan na Hulanda di nan nesesidat básiko mas fundamental i no ta duna ningun hustifikashon legal òf otro manera fundá, asina e organisashon ta bisa.
Na hopi paisnan den Europa no por kòrta awa na famia ku mucha. Segun e organisashon ku ta sali na defensa di derechi di mucha, Hulanda ta ignorá un yamada di Parlamento Europeo pa prohibí seramentu. Tambe Ombudsman di mucha i rapòrt di Nashonnan Uni a yama Hulanda pa tuma akshon.
Segun HiMA ‘wes na Kòrsou tambe a menshoná hurisprudensia di aprel 2022. Ku e sentensia di 19 di mart aki, esei no ta aplikabel mas’. Segun HiMA, finalmente wes ta bisa ku kòrta ta un akto ilegítimo.
Pa 25 di mart, presidente di HiMA, Yvonne Olf, lo tin un kombersashon via Zoom amplio ku organisashonnan di derechinan humano na Hulanda. Despues di esei, lo determiná kual ta e strategia pa e problema di awa na Kòrsou pa famianan ku i sin mucha, hende ku ménos entrada i mayor di edat.

PORTRET
Yvonne Wolthuis-Olf di organisashon Hende-i-Medio-Ambiente (HiMA)