WILLEMSTAD.- Inter Caribbean Airways simplemente tin di kumpli ku e loke a ser akordá ku InselAir, esta ku e kompania lo duna un garantia pa kumpli ku e akuerdo ku kreditornan. Den kaso ku e kompania no kumpli, e ta konfrontá un but (dwangsom) di $500.000. Esei tabata e veredikto ku korte a yega na dje i ku a bira konosí ayera komo desishon den e kaso ku InselAir a entamá. Básikamente t’asina ku e dos kompanianan a negoshá i yega na un akuerdo final kaminda ICA lo tin di paga un suma di garantia di $11.5 mion na inisio dje operashonnan. ICA a faya den su kumplimentu alegando ku su banko finansiadó lo no ke bai di akuerdo ku e kondishonnan ku el a negoshá.
Pa a yega na su desishon, korte a konsiderá lo siguiente:
Korte ta di opinion ku e palabrashonnan den e Heads of Agreement ta impliká ku InterCaribbean tin e obligashon pa duna garantia di tal forma ku e kombenio por karga aprobashon di korte. Mester evitá ku hues komisario a base di e dekreto di bankarota lo hañ’é obligá di nenga di aprobashon di hues pa motibu ku e lo no tin sufisiente garantia pa kumpli ku e kombenio. Den kuadro di esaki no por bisa ku a base di e obligashon pa duna garantia, i kaminda ta trata di e promé montante di $1.500.000 no por ser kobrá ainda. Esei pa motibu ku e kobransa ei tabata kondishoná na e aprobashon di hues.
Pa loke ta disposishon di e kantidat di avionnan, hues a deklará den e veredikto aki ku pa motibu ku partidonan ta diferensiá di opinion te kon leu por obligá InterCaribbean pa entrega di e avionnan i si e lo por kumpli ku e obligashon ei, i teniendo kuenta ku InselAir no a duna un bon splikashon dikon tin urgensia den esaki, e petishon aki lo ser rechasá.
Un di tres petishon tabata e stipulashon di tempu, ku korektamente InterCaribbean ta bisa di no ta den e Heads of Agreement. E motibu dikon lo mester mantené InterCaribbean na un término di tempu no ta sufisientemente kla. Mas tantu ta bai pa e obligashon general pa koperá ku ehekushon di e HoA di buena fe, pero korte no ta mira motibu pa konfirmá esaki mediante un veredikto.
A base di e ponensia i konsiderashonnan menshoná korte a disidí di ordená InterCaribbean pa e kumpli ku e garantia na tempu i promé ku e moratorio dje akuerdo ku kreditornan, i ademas a stipulá un suma obligatorio di $500.000 den kaso ku e no kumpli ku e obligashon i ku e kousa ku e moratorio aki ta ser rechasá dor di hues komisario pa motibu ku no tin sufisiente garantia.