SABA.- Gobièrnu di Saba ayera a duna di konosí ku nan ta hopi kontentu ku korte marítimo na Hulanda a duna su veredikto dia 24 di febrüari. Den su veredikto e tres wes di korte marítimo a disidí pa kita Saba for di tur ‘claim’ ku e kompania Elsa Shipping a entregá kontra e isla.
Elsa Shipping Limited (Elsa Shipping) a hiba entidat públiko Saba, Saba Conservation Foundation (SCF) i Hulanda korte. Pa motibu ku dia 22 di mart 2017 e boto MY Elsa a wòrdu dañá severamente. Segun Elsa Shipping, Saba ta kulpabel pa motibu ku ankramentu di e boto a bai kompletamente robes. Elsa Shipping a pidi pa rekompensashon di mas ku 7 mion US dòler pa motibu ku e lugá di ankra a kibra. Segun Saba e aksidente ta lamentabel, pero nan no ta responsabel pa e aksidente. E lugá di ankra no tabata bieu i a wòrdu di kontrolá korekto. Instalashon a bai segun reglanan.
Korte marítimo, den na veredikto, a disidí ku no tin prueba ku Saba a faya. Pa e motibu a disidí pa kita Saba for tur di e claim di e kompania Elsa Shipping.
Den un reakshon gobièrnu di Saba a duna di konosé ku nan ta hopi kontentu ku e veredikto. Den e defensa nan a traha hopi bon ku ministerionan hulandes (di Relashon interino i Relashon di Reino i tambe di Infrastruktura). Saba a wòrdu presentá dor di ‘landsadvocaat’.