WILLEMSTAD, -Sentensia di Burney “Nini” Fonseca den korte Superior a keda meskos ku korte di Promé Instansia den kaso Rizinia.  Ayera korte Superior den su veredikto a bisa ku nan ta haña Fonseca kulpabel di 1.5 kilo di koka i tambe labamentu di plaka. Fonseca a  keda kondená na un kastigu di 4 aña. El a keda akusá pa dos transportashon di droga dor di mulanan den periodo di aprel 2013 pa mei 2015  i tambe pa labamentu di plaka den e mes un periodo menshoná.

Korte a hiba e kaso via e sistema di konferensia di video. Esaki mirando ku Fonseca ta enkarselá na Ulanda pa su propio seguridat. Manera nos tur sa Fonseca ta e úniko sospechoso ainda den kaso Maximus. Ministerio Públiko a akusá Fonseca  di a laba 52 mil florin den 5 aña i un total di 1 kilo i mei.

Korte di Promé Instansia a husga ku e droga ku a keda haña na kas di e  amigu di e akusado di fam Hanson den un “frame” di maleta, ta di Fonseca. Esaki abase di e deklarashon di Hanson mes. Segun Hanson e tabata esun ku tabata prepará e droga den ekipahe nan i ta warda droga pa Fonseca.  Tambe e la konfesá di tabata tuma sèn pa e akusado riba su  su nòmber.  Korte di promé instansia  ta kondená Fonseca tambe pa e mula di fam B. ku a keda gara  ku 600 gram di koka na Schiphol. B a duna di konos’é ku e droga ta di Fonseca i ku e akusado ta wòrdu yama Sinterklaas. E apodo a keda konfirmá pa e yu muhé V. di e dama ku  tambe a keda gara ku 587 gram di koka i a bisa  ku ta Fonseca ta doño.

Hues di korte di Promé Instansia a usa 16 página pa motivá e veredikto den kaso di Nini, p’e splika dikon korte ta yega na e desishon konosí. Hues di Promé Instansia a indiká den su veredikto ku kontrali na e pensamentu di e defensa i ounke ku no tabatin beslag riba droga, tòg e deklarashonnan di V. tabata hopi konsistente i di otro banda e frekuensia ku Nini tabata biaha pa Ulanda.

V. a haña plaka den e periodo ei serka Nini, komo pago pa transporte di koka. E veredikto di ayera a revelá ku e mula di fam B a  hiba 600 gram di koka Ulanda pa Pretu i Nini.i ku su deklarashonnan tabata konsistente.

Ku e evidensianan sirkunstansial, aki hues a duna di konosé ku e ròl di Nini tabata krusial den eksportashon di koka ku su trafikashon den e droga e tabata fungi komo un intermediadó importante pa droga yega Ulanda. Abogado General mr Angela a haña e akusashon pruebá, i ta bolbe pidi 4 aña pa e akusado.

Abogado Vaders  a bisa ku ta insolito pa sigui tene su kliente sera. Segun Vaders su kliente a sinta 30 luna kaba i ku esaki ta un periodo bastante hopi, pa e loke nan ta akus’é di dje. Despues di e veredikto abogado mr Marije Vaders a keda basta desapuntá.  El a duna di konosé ku awor si e no sa mas kon korte ta wak e kosnan. Su kliente tin mas di 30 luna sera akusá pa 1 kilo i mei i kondená na 4 aña. Loke ta straña i ta inkomprendibel pa e abogado, ta ku  a demandá e trio ku a trata na pone 280 kilo di koka riba djèt priva mas arma i munshon  na 6 aña.