WILLEMSTAD. - Wes mr. Corrie ter Veer a mishi ku e aspekto di publisidat di proseso hudisial i veredikto ku por sierto tin koleganan ku no ta ful di akuerdo ku e punto di salida enkuestion. Na e momentunan aki Korte Supremo (Kasashon)  tin un desishon pendiente riba e partikularidat menshoná, kaminda ku Prokuradó General ya a duna su punto di bista ariba.

Refiriendo riba un publikashon di un periodista ulandes di NRC, ku a kritiká e sistema di transparensia di kasonan hudisial, e periodista a menshoná ku nunka un periodista no por prepará pa un kaso, pa motibu ku e no tin akseso na sierto dokumentonan, no sa ken ta e wesnan, ken ta abogadonan i kiko ta e kasonan, pa sa si e ta interesá den tal kaso òf no. For di un enkuesta den Europa, Ulanda a sali te abou riba e lista pa loke ta trata transparensia den kasonan hudisial.

Den un konklushon resien di yüni 2022, Abogado General di Korte Supremo, a kontestá un pregunta, esta  si kortenan ta obligá di duna informashon di kasonan sivil ku ta den proseso na tersera. E Abogado General mr. Wesseling-van Gent a konkluí ku korte mester a duna e informashonnan pidí, esaki basá riba veredikto di Korte Europeo pa Derechonan Humano. Den nan konklushon ta bisa ku un kaso ta públiko ora ku e públiko por tuma nota ki dia tal kaso ta tuma lugá. Generalmente e tipo di informashonnan aki no ta keda duná na sivil i tampoko periodistanan. Pero ainda Korte Supremo no a duna su último palabra riba esaki.