El a keda kondená na kastigu kondishonal i trabou pa komunidat

WILLEMSTAD.- Korte di promé instansia resientemente a trata kaso di  e hòmber R. Ortega (57) akusá di a trata na eksportá 1495 gram di koka  dia 7 di sèptèmber último pa Hulanda.

Ortega a presentá den sala di korte pa responsabilisá su mes pa su akto.

El a atmití su kulpa i a bisa ku  e ta kompletamente arepentí pa loke el a hasi.

Segun Ortega ta pa motibu di desesperashon ku e no tin un trabou i un entrada i riba dje  su problemanan finansiero ku kada bes ta bira mas tantu, a hasi ku el a kai den intento pa pasa droga.

El a konta ku dor di su desesperashon, el a bai konta un tal Julio su problemanan finansiero.

El a splika Julio ku su negoshi di fèrfmentu no ta bayendo bon i ku e no tin pariba ni pabou.

Julio na su turno a bai serka un otro persona ku mesora a  aserk’é pa pasa droga.

Nan a bisa Ortega ku e trabou lo no ta difísil  i ku e lo haña 2700 euro ora ku e yega Hulanda.

Ortega a bisa ku despues di tantu pensa, el a disidí di bai di akuerdo ku e “deal”. E mester a entregá 2 djòki di dje i 3 ora promé ku e subi avion el a haña e djòkinan bèk yená ku droga.

El a bisa ku e palabrashon tabata 800 gram, pero na momento ku el a keda detené a resultá ku tabata mas tantu.

Segun e akusado frustrashon i desesperashon a hunga un ròl grandi riba dje. E krísis di COVID-19 tambe a hunga un ròl debí ku e no tabatin entrada.

Su mama ta malu, e tin yunan na Hulanda. El a bisa ku e tin masha miedu di esun ku a dun’é e droga p’esei e no por divulgá su nòmber.

Hues a bis’é ku eigenlijk e mester a siña su lès pasó  na  aña 2003 el a kometé mesun akto. E akusado a bisa ku el a haña 24 luna di kual 6 kondishonal, pero a sinta 8 luna so pa falta di prueba.

Fiskal Girigoria- Hernandez  a bisa ku nan lo tene kuenta ku edat di Ortega i tambe su sirkunstansianan personal. Mirando esakinan e ta yega na un demanda di 15 luna  kompletamente kondishonal pero fiskal ta haña ku e mester sinti loke el a hasi i ta dun’é 250 ora di trabou i si e no kumpli e tin ku sinta 120 dia.

Hues den su desishon no a mira motibu pa desviá i a bai di akuerdo ku e demanda di fiskal.