WILLEMSTAD.- Un damita a disidí bai korte ku su mama i tata, pa nan por hasi DNA tèst p’e sa si e hòmber kurasoleño ta su tata. Ta trata di un yu ku a nase na St. Maarten, pero ta biba aki na Kòrsou serka un hòmber kurasoleño ku ta nenga di ta su tata biológiko. E hòmber a nase na Kòrsou i ta biba aki.

E yu a indiká ku e hòmber kurasoleño ta su tata, kende tabatin un relashon ku su mama i asina a prokreá un yu. Pa e yu, e hòmber di Kòrsou ta su tata biológiko.

A base di artíkulo 1:207 insiso 1 sub b di e Buki di lei Sivil, hues por ordená e hòmber pa hasi e tèst di DNA si e yu pidi esaki.

E hòmber kurasoleño ta desmentí di ta tata biológiko dje mucha. E ta atmití di a biba na St. Maarten un temporada. Den e tempu ei en bèrdat e tabata amigu di e dama, pero nunka a traha un yu kuné. Apesar di esaki, e damita for di su dos pa kuater aña a bin Kòrsou, i for di e dia ei e kurasoleño a kuid’e i eduk’é. Tambe e hòmber ta atmití ku e ruman hòmber mas grandi di e supuesto yu muhé aki,  hurídikamente el a rekonosé komo su yu.

Hues den e kaso aki a indiká ku for di su kuater aña, e yu aki ta biba na Kòrsou. Te ku su 12 aña, e damita aki a keda kuidá i lantá dor di e hòmber kurasoleño.

E hobensita a nase na St. Maarten, pero nunka a inskribí su nòmber den registro Sivil di St. Maarten. Aki na Kòrsou tampoko e hobensita no ta inskribí den Registro Sivil. Pues e damita no tin pasport i no tin ningun nashonalidat. E damita a entregá korte un karta di su ruman ku ta un aña mas bieu kuné, kaminda e ta bisa ku e hòmber kurasoleño a yega di bis’é, ku tantu e damita ku e ruman hòmber ta yu dje hòmber kurasoleño.

Mirando loke a bin dilanti, hues ta haña ku no por fiha ku siguransa ku e hòmber kurasoleño ta tata biológiko di e damita. Mirando ku tin sufisiente punto di atenshon, ku ta indiká ku e hòmber kurasoleño lo por ta tata dje mucha, hues ta bai di akuerdo pa hasi e DNA tèst.

E hòmber kurasoleño a bisa di lo duna su kontribushon pa hasi e tèst di DNA. Pues hues ta ordená e hòmber pa entrega material pa hasi e tèst en kuestion.

E gastunan di e tèst ta ser kargá por parti dje mama i e hòmber kurasoleño. Den kaso si e kurasoleño resultá di ta e tata, anto e tin di paga e gastunan kompleto di e tèst di DNA.

Si e mama òf e kurasoleño nenga di hasi e tèst, hues a bisa di lo “mara” su desishon na konsekuensia.

Fin di e luna aki, hues ta spera di haña e rapòrt di DNA.