WILLEMSTAD.-  Korte a bai di akuerdo ku abogado Gomez, pa posponé kaso di su kliente J.F.(23), akusá pa maltrato severo di e víktima Boelbaai.

J.F. ayera a presentá den sala di korte, pa responsabilisá su mes pa su akto. Segun e akusashon, dia 21 di yanüari último, el a agredí e víktima i morde su dede kita afó.

El a hasi esaki dor di hinka e víktima su dedenan den su boka i ku forsa a kita parti ariba di su dede afó. Esaki a pone ku e akusado tabatin hopi doló.

Abogado mr Gomez a pidi pa posponé e kaso, pa e haña rapòrtnan di Reclassering, sikiater i sikólogo.

Fiskal na su turno a bisa ku e akusado a haña vários sita pa bai sikiater, sikólogo i Reclassering  promé ku tratamentu di e kaso, pero e  no a reakshoná. Pues e no tin garantia ku aworakí si e ta bai.

E akusado a bisa ku Reclassering a bin kas serka dje, pero despues e no a tende nada mas di nan. Mas aleu el a duna di konosé ku awor si e ta kla pa bai e sitanan.

Hues na final a bai di akuerdo pa posponé e kaso, pa asina duna e akusado chèns pa e bai e tratamentunan menshoná pa haña e rapòrtnan konserní.

E fecha pa tratamentu di e kaso, lo keda anunsiá despues.