Korte ta rechasá maneho di intimidashon/trato inhumano na trahadónan

Tin tres rapòrt profeshonal ta indiká ku no tin problema ku airu den edifisio

WILLEMSTAD.- Gerensia di korte Komun di Hustisia, ta rechasá di forma kategóriko ekspreshonnan di sindikalistanan den sentido ku e instituto lo ta praktiká maneho di intimidashon i ta duna trato inhumano na su trahadónan. Komo ku ta trata di kaso un konflikto laboral ku un kolega gerensia di korte no ke bai den muchu detaye riba e kaso. Na palabra mr. Sigmar Carmelia wes di prensa den deklarashon na EXTRA.

Ya pa algun dia kaba por a tuma nota di dirigentenan sindikal ku ta trese dilanti ku gerensia di korte di hustisia lo ta aktuando di un forma hopi iresponsabel ku su trahadónan. Esaki ta basá riba situashon di trahadónan ku lo ta sinti malu den e edifisio prinsipal di Korte na Wilhelminaplein i tambe den e edifisio KNSM den Punda. Segun dirigentenan sindikal, gerensia di korte a bai asta asina leu di ta hasi intento di kita trahadónan ku ta mèldu malu.

Relashoná ku e akusashonnan aki EXTRA a puntra gerensia di korte pa duna splikashon. Den e kaso aki wes di prensa Sigmar Carmelia a duna di konosé ku den pasado enbèrdat tabatin algun keho di koleganan di Korte ku ta traha den e edifisio KNSM, kaminda temporalmente a ubiká algun kolega. E kehonan tabata trata e kalidat di aire den e edifisio en kuestion. Gerensia di Korte a tuma tur e kehonan aki na serio i a laga hasi e investigashonnan nesesario den e edifisio. Entretantu tin 3 rapòrt den kua tin pará ku no tin niun problema ku e kalidat di aire den e edifisio. E rapòrtnan ta indiká ku e edifisio ta kumpli ku tur e normanan korespondiente. Gerensia di korte ta distansia su mes di forma kategóriko di e ekspreshonnan manera ‘gerensia di Korte lo ta duna su empleadonan un trato inhumano’ i ‘ku lo ta intimidá e trahadónan’, etc. etc.

Wes Carmelia a sigui bisa ku e situashon aktual ta trata un konflikto laboral individual, motibu pa kua no ta étiko pa na e momentonan aki, aparte di e reakshon aki, gerensia di Korte duna un entrevista i/òf sigui elaborá den mas detaye tokante e desaroyonan aki.

 

SHARE

LEAVE A REPLY