WILLEMSTAD.- Ayera korte a rechasá petishon di seis venezolano indokumentá pa laga nan den libertat na Kòrsou. Ta trata di sinku hòmber i un hende muhé venezolano ku a yega nos pais ku lancha den oranan di mardugá di 8 sèptèmber 2020. Nan tabata den e grupo di 40 indokumentado.

...Abogado Shalton Hato ku a defendé interes di gobièrnu...

Den e grupo aki atrobe tabatin un damita menor di edat ku tabatin 16 aña i entre tantu a bira 17 aña. E damita aki, ku ta un menor di edat ta será na JJIC na Kwartier. Ounke e damita no kier a bai, pasobra el a bisa ku mester trat’é komo hende grandi pasobra e ta un mama. Pero pa hues esaki no ta argumento p’e keda sin bai JJIC.

Pa loke ta trata e petishon di protekshon den kuadro di artíkulo 3 di Derecho Humano, ainda korte tin di dikta un sentensia riba e parti aki. E seis indokumentado nan a hasi apelashon riba e artíkulo aki, ta pa nan keda na Kòrsou, pasobra si nan regresá Venezuela nan tin miedu di represaya kontra di nan, pasó nan a sali for dje pais ku lancha bin Kòrsou.

Manera e prosedura ta, ku dia 9 di sèptèmber 2020, gobièrnu a saka un desishon pa ekspulsá e indokumentadonan for di Kòrsou. I pa un periodo di 3 aña, e indokumentadonan no por drenta nos pais. Kontra e desishon aki di minister e indokumentadonan a bai korte.

Minister por bin ku medida pa e indokumentado por keda riba nos isla na momentu ku instansianan òf hendenan konfiabel ta dispuesto pa para garantia pa e indokumentado durante dje periodo ku nan tin di warda e desishon di keda ekspulsá for di nos isla;  si no tin un bista di ekspulshon di e indokumentado pa su pais, pasobra e no ta den posishon òf por haña su dokumentonan legal pa por biaha; òf nan mester mèldu obligatoriamente i entregá nan pasport na polis.

Manera ariba konosí dia 8 di sèptèmber último, Wardakosta a interseptá un lancha den nos awanan. A detené e indokumentadonan i a pasa nan pa barak na prisòn.

Dia 9 sèptèmber 2020, e indokumentadonan a pidi protekshon a base artíkulo 3 di e Tratado di Derecho di Humano manera ariba menshoná.

Hues a indiká ku tanten no tuma desishon riba e petishon di protekshon, no tin motibu pa pone e indokumentadonan den libertat.

Segun hurisprudensia e indokumentadonan ta un peliger pa órden públiko e forma kon nan ta drenta nos pais.

Tin hende ku kier para komo garantia, pa e indokumentadonan, pero na opinion di hues e persona ku ke para garantia no ta kumpli sufisientemente ku reglanan pa para garantia.

Teniendo kuenta ku esaki, hues ta rechasá e petishon pa laga e indokumentadonan den libertat.