Curacao Professional Frieworks Display 3D

Gustavo Semeleer

...E aña aki nos por spera realmente kosnan grandi pa ku e shownan di vürwèrk. Gustavo Semeleer di Curacao Professional Fireworks Display 3D ta bai tin por lo ménos 2 siman di shou. Manera el a bisa Djasabra “mi ta vol geboekt”. No tin espasio mas pa e tuma ni un show mas, asina el a konta nos.

Un di e shownan kaminda lo bai tin kosnan espektakular segun Gustavo ta dia 31 di desèmber anochi, den bahia di Sta Ana. Einan el a menshoná ku e lo bai tira kolonan di bandera di Kòrsou. E efektonan lo bai den laman bira strea bai haltu. E aña aki ta bai tin un kos di kita sombré. E show den haf lo tin algun kos ku nunka promé un hende por a mira. “banda ku shownan di vürwèrk ta mi negoshi, e ta mi hòbi tambe i ora bo tin algu ku ta bo hòbi, ferwaktu ku e lo ta bon hasi sigur”, Gustavo a bisa ku su sonrisa di orguyo di loke e tin pa Kòrsou.

Gustavo Semeleer; “mi no por imaginá mi un fin di aña sin vürwèrk. Mi a kuminsá na un edat hopi yòn. For di mi 14 pa 15 aña mi tabata gusta vürwèrk pero e tempu ei bo no por haña e kosnan pisa kumpra. I semper ta pakete di mucha pero esei no ta loke mi tabata ke. Semper mi a gusta vürwèrk i asina mi tabatin edat ku mi por a bai den e sistema di mas profeshonal mi a hasié tambe”.

Niun show ta meskos....

Gustavo awor ta kompletamente profeshonal. I hopi biaha un hende no por imaginá nan mes kuantu tempu bo ta hinka pa yega na un show. Tur su shownan e ke pa nan ta diferente di otro. si e tin 4 show riba un dia e ta sòru pa nan no ta meskos ku otro. E ta lanta for di mardugá pa e kuminsá hinka e shownan di e dia ei den otro, e ta programa di sekònde pa sekònde. No ta fásil i Gustavo ta dediká su tempu na dje. Por ehèmpel e ta tene kuenta ku si ta kaminda tin waya e no ta tira un “cake” ku ta tira wairu pero stret. No ta algu fásil manera hopi hende ta kere.

Sertifiká komo “master”.....

For di 1998 ya Gustavo tabatin kontakto ku hendenan na China i na 2001 el a bai China pa asina e pasa su eksámen kual a bai den un tiru. Pero ya for di promé ku el a yega asina leu e mester a pasa diferente tèst pa mira si e ta apto pa e nivel ku e kier a yega na dje, debí ku e kier a kue su Master. I pa yega asina leu bo mester tin 7 pa 8 aña ta tira pa por kumpli. Na 2001 el a pasa su kurso promé i despues di añanan el a sigui ku tèstnan na Merka tambe. Esaki ta pone ku Gustavo por tira internashonal pasobra e tin e sertifikashonnan di China i di Merka, kual ta e rekerimentu nesesario. Ku tur su kursonan i graduashonnan a pone ku Gustavo no solamente por hinka show den otro pero tambe e por firma sertifikado, e por kùr i tèst vürwèrk, e por pasa hende eksámen, no tin algu ku e no por hasi. El a siña on traha vürwèrk na China i e mes tabatin algun efekto ku e mes a diseñá. Gustavo a ba hopi dip den e asuntu di vürwèrk i p’esei e ta sumamente orguyoso di kaminda e ta awe.

Efektonan nobo....

Gustavo mes ta diseñá su vürwèrk; e ta manda pidi China por ehèmpel kua kolo e ke, kon e ke su efektonan, ta kosnan ku ta keda tèst i ta waknan riba video call pa e wak si e ta na su smak. I hopi biaha e mes ta bai China pa mira si ta realmente loke e ke. I den e kuadro aki e aña aki ta bai tin efektonan nobo ku lo keda introdusí 31 di desèmber, manera Gustavo a splika nos.

E aña aki segun Gustavo, e lo bai tira un kortina di kandela den Haf, dia 31 di desèmber. Tur esaki lo keda kordiná ku Haven Inspectie. Tur aña e ta haña kooperashon di instansianan pa yega asina leu. El a diseñá e kolonan neon di e brùg di ponton, e kolonan di e brùg di Skalo i e stepnan lo kai den laman i bira streanan. Ta un show úniko komo el a diseñá i e mester a pidi su pèrmitnan na minister di hustisia. “Mi ta kontentu ku e dia ei i pueblo di Kòrsou lo keda kontentu kon e show lo keda hinka den otro”.

Gustavo ta kontentu, e próksimo 2 simannan e ta yen yen di shownan i no por tuma nada mas aserka. Djaluna su programa lo ta kla i lo keda publiká. Tin shownan ku a keda tira kaba i tambe tin lugánan kaminda e ta tira pero ta keda priva. Dia 31 e tin 14 show. Gustavo tin un tim di 40 persona i 12 a pasa asta nan eksámen i den nan tambe tin hendenan spesial pa shownan na Boneiru. Seguridat ta algu masha importante pa Gustavo i tur esnan ku ta traha kuné sa kon e ta pensa i aktua ora ta trata di seguridat.

Shownan internashonal...

Gustavo Semeleer no tin shownan di vürwèrk solamente na Kòrsou i islanan bisiña pero tambe e ta tira internashonal. El a kaba di Sali dos luna pasa Paris i Bèlgika kaminda el a tira pero tambe aña pasa el a tira na Spaña i Valencia. Den pasado tambe Sürnam St. Maarten, Aruba. I pa otro aña ya e tin un kontrakt pa tira na Hapon pasobra nan a keda enkantá ku e show ku el a duna na Spaña. “MI ta kere ku e papel ku lo mi hunga na Hapon, lo duna Kòrsou un fama hopi grandi, i mi ta kla pe”, asina Gustavo a bisa Djasabra.

Show largu no ta esun mihó....

Hopi hende ta kere ku e show mas largu ta e show di mas mihó. Esaki segun Gustavo Semeleer no ta korekto. El a yega di tira show di 15 minüt pero tabata un show yen i esei a bon bon. Pero tambe el a tira un show na Spaña di 3 minüt i algu pero einan a usa vürwèrk ku el a tira den 6 show na Kòrsou. No ta bai pa e largura pero ta bai pa un show yen i esei ta e diferensia. “Mi ta gusta mi shownan yen”. E show di haf lo ta unu largu pero yen. Den e dos simannan aki lo bai ta algu grandi.

Seguridat...

Pa Gustavo seguridat ta bin na promé lugá, na di dos lugá i na di tres lugá. E no ta pèrmit pa dal kaba abou, no ta permití pa huma ni bebe serka dje, Gustavo mes no ta huma ni bebe. No ta pa loko ta habri kaha, no ta pa loko ta kòrta mecha, wak si tin palu i waya di koriente. E ta hasi su investigashon promé pa sa kiko e por tira. E no ta pidi pèrmit kaminda e sa ku ku ta un kaminda ku e no por tira vürwèrk einan. Ora ta habri un cake, wak pa bo kurpa no ta riba dje. I den kuadro di seguridat Gustavo ta haña ku e forma ku awor ta warda e vürwèrk den kruithuis ta esun bon. ta algu ku e mes a lucha hopi aña pe. E mes a yega di traha un diseño kon un Kruithuis mester ta i el a entrega esaki na e minister di hustisia di e tempu ei. Solamente e ta kere ku e union entre nan ku ta importadó i e instansianan di gobièrnu bira mas fuerte. Mester wak e dolónan di ámbos banda pa e kosnan bai mas fásil, sin kita for di regla.

Desaroyo 17 aña...

E desaroyo di vürwèrk den 17 aña, Gustavo a bisa ku un sonrisa ku ainda tin e pop pop i e galiña ku for di tempu e mes tabata chikí. Na China i Merka tin hopi kos ku a kambia. Por ehèmpel e grond stof ku ta usa pa traha e vürwèrk. Si ántes e huma ta kima bo garganta no ta keda usa mas. Na China awor ta usa aros i plèstik pa traha vürwèrk. I tin kontrolnan pisa riba vürwèrk i no ta pa loko ta inventá un vürwèrk. E manera ku vürwèrk a desaroyá ta hopi pero na Kòrsou no ta tene kuenta ku tin hopi kos nobo riba merkado. Ántes tabata tira un bala di 10 i 12 dùim pero awor a baha esaki te na 4 dùim. Gustavo a yega di traha ku bala di 32 dùim i nada ta imposibel pa tira solamente mester tene na kuenta e reglanan kon pa tira e vürwèrk. Gustavo a bisa ku e lo no bin ku un vürwèrk ku ta kousa daño kisas na bentana di hende. “Mi no ta ISIS tampoko”, asina el a bisa. E ta spera ku por yega na balanan sikiera na 10 dùim den shownan na Kòrsou.

Zonido duru te kos....

Un show di vürwèrk sin e zonido duru no ta un bon show. Mester di kombinashon di e zonido i e lus, e efektonan. El a yega di eksperensia ku hende ta bisa nan no ke zonido duru pero despues tòg ta bisé mihó e tabatin e  zonido duru ei. E zonido duru ta pep op hende, segun Gustavo. I ora eksperensia e vürwèrk na China por komprondé loke e ta bisa. I na China segun Gustavo nan ta atendé ku e vürwèrk na un forma masha pekuliar. Pa nan e vürwèrk ta manera nan dios, debí ku e pagara ta e dragon. Un chines nunka ta pone un pagara abou pero na haltu. Esei ta nan kerensia. I ora nan tira vürwèrk tambe e ta bai ku sierto kerensia. Por ehèmpel hende ta tira vürwèrk pa kima sèn pa asina nan por haña mas sèn....kada ken ku nan pensamentu.

Gustavo mes no ta bende vürwèrk den stent. Ántes si el a kuminsá ku bendementu di vürwèrk. Loke si ta remarkabel ta ku ántes dia 31 por tende mas vürwèrk ku awor. Si analisá e benta a baha poko. Den sierto bario bo ta tende e zonidonan mas ku den otro bario.

Konseho....

Gustavo Semeleer su konseho na pueblo di Kòrsou ta pa no tira vürwèrk riba outo, ni riba bestia, ni banda di bòm di gas. “Aña pasa mi a para un grupo ku tabata hunga beisbòl ku un dònderbos. Esun ta picha i e otro tin di bati e dònderbos sende, ta chansanan straño”. Mi ta pidi pa tene nos mes mas sigur posibel. I te na ora tin un aksidente mes mester distinguí ku ta e persona a faya òf ta e vürwèrk pasobra hopi biaha eksperensia a siña ku ta e hende ta faya den uso di e vürwèrk. I den futuro hopi serka, kisas otro aña mes ta Gustavo su yu, 10 aña lo por traha un show. Keda pendiente!