WILLEMSTAD.- Ta remarkabel kuantu notisia negativo tin rondó di Kuerpo Polisial di Kòrsou (KPC) durante e último dianan. No mas ku ayera mainta detenshon di 4 agente a keda prolongá pa akto di posibel ladronisia, i ayera mainta mes un otro agente polisial su nòmber a bin dilanti den un kaso den korte, kaminda e lo a kometé un akto ku sigur lo no por mira lus di dia den Kuerpo Polisial.

Ta trata aki di un agente polisial di fam M. E agente aki su nòmber a bin dilanti despues ku a sali na kla ku el a “fia” alrededor di 15 mil florin di plaka konfiská den un kaso di ladronisia. E agente polisial tabata esun ku ta atendé ku e kaso i tabatin e 15 mil florin ku a konfiská serka e sospechoso ku a hòrta esaki dje víktima,. Momentu ku e víktima a bai pa tuma su plaka, e agente polisial di fam M. a pidi e víktima, kende ta un komersiante, pa fia e plaka i ku e lo paga e komersiante víktima e sèn tiki tiki. E akto aki a tuma lugá for di aña pasa òktober.  Hasta e lo a kue alrededor di 800 florin for di pòtmòni dje víktima komersiante.

E víktima a bai di akuerdo, pero a firma un dokumento polisial ku ta bisa ku e lo a risibí su plaka ku a keda hòrta bek. Pero esei no a sosodé, pasombra e agente polisial M. a “fia” esaki. Te ayera ku e kaso a keda trata den sala di korte, e agente polisial di fam M. nunka a paga e víktima komersiante niun depchi.

E agente polisial a konfirmá ku enbèrdat e la laga e víktima firma ku e la risibí e plaka pero a pidié p’e fi’e sèn i e lo paga tiki tiki. Pues ku otro palabra e agente a “fia” e sèn pa por paga tiki tiki.

EXTRA a tuma kontakto ku bosero di Kuerpo Polisial di Kòrsou sr. Imro Zwerwer kende a indiká ku KPC ta na altura di e kaso aki ku ayera mèrdia a bira konosí den sala di korte. Mirando loke a sosodé, KPC ta deliberando kua medida lo bai tuma den e kaso aki kontra e agente polisial, i tambe ta pendiente di Ministerio Públiko ki stap ta bai tuma kontra e agente polisial enkuestion.