WILLEMSTAD.- Kontròl di polis a sòru pa buraku den marcha. Asina un boletin ofisial di Kuerpo Polisial a informá relashoná ku e aktividatnan karnavalesko di ayera tardi. E ta bisa ku, Kuerpo Polisial a risibí krítika pa e echo ku na un okashon a krea buraku durante di e Marcha Hubenil ku a tuma lugá djadumingu 4 di febrüari último. Polis ta rekonosé ku e kontròlnan na salida di e marcha, di bèrdat a kuminsá un poko mas lat di loke ku tabata planiá. Esaki pa motibunan organisatorio ku tabata nesesario pa e agentenan a kumpli kuné promé ku nan a sali kaya.

Sinembargo, hustamente pasobra nan a yega na e punto di kontròl mas o ménos mei ora promé ku e marcha mester a sali i pa no stroba desaroyo di e marcha, a opta pa kontrolá dokumentonan di e promé vehíkulonan miéntras ku esakinan tabata den moveshon. Te na momentu ku nan a bin topa shofùr di un vehíkulo ku ta forma parti di e marcha, ku no tabatin su dokumento di inspekshon huntu kuné. E vehíkulo ei si polis mester a para kompletamente te na momentu ku e shofùr por a mustra e dokumento.

Den e kaso aki polis a mustra fleksibilidat pa buena marcha, dor di aseptá e dokumento di forma digital. Miéntras ku polis tabata atendé ku e shofùr aki, e promé parti di e marcha a kontinuá kreando asina ei un buraku. No opstante e loke ku a sosodé, polis a sòru di tene e ruta liber pa asina e marcha por a sigui move sin mas estorbo i yega su final den tur trankilidat, ku un durashon di tempu mas kòrtiku ku e aña anterior.

Kuerpo Polisial ta pidi su diskulpa pa e buraku ku a keda kreá pa motibu di e kontròlnan ehersé ariba menshoná i lo bai hasi un evaluashon internamente. KPC lo komprometé ku pa e siguiente marchanan e kontròlnan lo keda efektuá na tempu, basta ku e vehíkulonan tambe yega e punto di kontròl na tempu.