WILLEMSTAD.- Relashoná ku un informashon ku a sali resientemente den prensa, indikando ku KPMG Dutch Caribbean ta akountent di Banko Sentral di Kòrsou i St. Maarten, EXTRA a komprondé ku esaki no ta kuadra ètòl ku bèrdat.

E tipo di informashonnan aki por kousa hopi daño na nòmber di kompanianan lokal, ku ta empleado hopi mama i tata di famia i sigur den e ekonomia aktual ku no ta di kanta makamba.

EXTRA a komprondé ku e kompania lokal KPMG nunka a sirbi komo akountent pa Banko Sentral, ni sikiera den tempu di Antia ni tampoko despues di 101010 ku tin un banko sentral kompartí. E medio ulandes (FD) a sòru pa bastante intrankilidat bou di e trahadónan di KPMG DC.

A base di esei e kompania lokal a klarifiká pa EXTRA ku nan eks presidente ku ta Ralph Palm nunka a traha komo akountent pasobra di profeshon e ta un fiskalista, pues e pida ei tampoko no ta bèrdat. Ta for di 2009 Palm a baha komo presidente di KPMG i no tabatin niun relashon mas ku e kompania.

KPMG DC hopi kla a enfatisá ku e kompania no ta bai mete den kaso di korte kaminda ta menshoná su eks presidente, pero ta importante pa duna informashon korekto i no trose bèrdat pa logra metanan skur.

Ta bèrdat ku Palm tabata presidente komisario di Banko Sentral pa un tempu pero esei ta a base personal komo eksperto di impuesto. Tambe a sali na kla ku Palm tabata konsehero personal di e eks presidente di Banko Sentral. A skibi ku ta KPMG tabata akountent di Banko Sentral den e periodo ku Palm tabata presidente di e hunta di komisario di e instituto i esei ta totalmente eróneo.

No ta promé biaha ku kompanianan lokal inosentemente ta bira víktima di polítika i prensa ulandes den nan kampaña pa di manera sistemátiko kibra empresanan di Kòrsou. Tin sufisiente prueba ku despues ku kibra kompanianan lokal i ku yunan di tera pèrdè trabou ta traha otro konstrukshon pa trese mesun servisio i produkto bèk riba e merkado aki, sin ku yunan di tera tin muchu probecho.

Den e kaso aki tabata hopi simpel pa verifiká e informashon i p’esei KPMG DC ta enfatisá ku nan ta keda habrí pa duna informashon korekto pa asina informá nos komunidat.

E korant ulandes Financieel Dagblad online a publiká un rektifikashon den su edishon di ayera kaminda nan ta papia di un fayo garafal ku mester a keda koregí. I konsekuentemente nan a rektifiká e informashon robes publiká kontra di KPMG tambe Palm i banko Sentral bisando; Palm no ta un akountent pero un fiskalista. KPMG no tabata e akountent ku tabata kontrolá CBCS.  Palm for di 2013 no ta traha mas na KPMG.

FD no a aserká KPMG ni promé ni despues di e publikashon di e artíkulo;

KPMG DC no ta komentá’ esta publikashon sin base, sinembargo e artíkulo aki tabata kontené asina tantu kos inkorekto ku KPMG a haña nan obligá di pidi rektifikashon.