WILLEMSTAD.- Ministerio di Maneho di Gobernashon, Planifikashon i Servisio Públiko ta informá ku relashoná ku trabounan interno Departamento di Asuntunan Públiko (Kranshi) lo ta parsialmente será dianan 28 i 29 di desèmber 2023. Riba e dianan menshoná aki lo no por risibí kliente personalmente na bali.

Tuma nota si di e siguiente eksepshon:

Solamente èksamen di teoria i práktiko pa reibeweis ta sigui konforme e fecha di e èksamen.

Ningun otro servisio ku Kranshi òf reibeweis sa duna por tuma lugá e dianan menshoná aki.

Pa mas informashon òf kaso di urgensia por tuma kontakto ku Lokèt di Pèrmit, Departamento Bentana di Informashon, na tel. 433-3123. Tambe por hasi uso di e lokèt digital via https://loketdigital.gobiernu.cw .