Kranshi no tin outoridat pa kita nashonalidat ulandes di yu ekstranhero rekonosé pa tata yu di Kòrsou

WILLEMSTAD.-Den un veredikto di 23 di ougùstùs 2023 Korte den Promé Instansia a revoká e karta di hefe suplente di Kranshi di 3 òktober 2022, den kua e ta informá L.R. ku e akto di rekonosé na aña 1990 na Santo Domingo ta nulo pasobra su tata tabata kasá ku un otro señora ku no ta su mama i esaki ta kontra artíkulo 330, insiso b, di e Kódigo Sivil di Antia Hulandes. Abogado Achim Henriquez den un informe ta splika ku e veredikto Korte a bisa ku ni e hefe di Kranshi ni Minister di BPD no tin e outoridat pa kambia nashonalidat ni fam di hende.

Den e tratamentu di e kaso por komprondé ku di parti di Kranshi e konsekuensia di e anulashon akí ta ku L.R. nunka a bira Ulandes i no a haña e fam ni relashon familiar ku su tata. Kranshi ta bisa L.R. ku nan lo registr’é ku fam di su mama i kambia su nashonalidat Ulandes pa nashonalidat Dominikano.

E prosedura pa kambia nashonalidat i fam mester kana via Korte konforme artíkulo 1:24 di nos Kódigo Sivil kaminda un hues lo por duna e ámtenar di Kranshi òrdu pa hasi e kambionan ku e ta haña nesesario. No por hasi niun kambio sin òrdu di hues.

Mas aleu abogado Henriquez ta mustra ku Korte a atendé Kranshi riba e echo ku Korte di Kasashon (Hoge Raad) ya for di aña 1989, y Korte na Kòrsou mes tambe e.o. na aña 2021, a dikta ku e prohibishon di artíkulo 330, insiso b, di e Kódigo Sivil di Antia Hulandes ku tabata prohibí hòmber kasá  di rekonosé nan yunan nasé  pafó di matrimonio, ta bai kontra di artíkulo 8 di Tratado di Derechonan Humano Europeo riba “bida familiar” pa kual motibu e artíkulo 330, insiso b, tin ku keda for di konsiderashon (buiten beschouwing). Entretantu na aña 2001 a saka artíkulo 330, insiso b for di nos Kódigo Sivil ku a hasi posibel pa hòmbernan kasá por rekonosé nan yunan ku a nasé pafó di matrimonio.

Den su konklushon Korte a dikta ku e apelashon di L.R. tin base. Korte a revoká e karta di e hefe suplente di Kranshi. Ku esaki e karta akí no ta eksistí mas i Kranshi lo tin ku duna L.R. su sédula, reibeweis i pasport komo Ulandes.