Publieke Zaken òf den boka di pueblo Kranshi a sali hopi bon for di enkuesta di Ombudsman. Un servisio ku den pasado tabata skor hopi abou, awe ta un di e mihó servisionan di gobièrnu. Ruthline Haddoks hefe interino di Kranshi, orguyoso di henter su tim a konta algu mas di Kranshi.
E sekreto.....
“No ta kiko ami a hasi pero kiko nos tur di kranshi a hasi ku a yega na e resultado aki”. Ruthline a splika ku na 2011 tabatin un enkuesta kaba hasi dor di prof Cijntje ku a hasi e komparashon riba servisionan di gobièrnu, i einan Kranshi a skor riba tur tereno esun di mas malu. “Awor mi ta kontentu di bisa ku nos a skor mihó i mi ta super kontentu ku esaki. I mi ta papia di nos pasobra no ta ami so a hasi. Na 2013 mi a bria hefe interino i einan kaba huntu ku Zino Narvaez ku e tempu ei na 2012 tabata hefe interino, nos tabatin proyektonan trahando ariba”. Algun di e proyektonan tabata ku na 2014 trahadónan di kranshi a bai Ulanda pa konosé e munisipionan einan (Amsterdam, Den Haag, Rotterdam i Utrecht”, wak kon nan ta traha, interkambiá di ideanan ku e munisipionan ei i bin bèk Kòrsou. Mester invertí den e trahadó pa haña resultado. Na 2011 tambe a hasi e enkuesta kon servisial e trahadó na bali ta i den e enkuesta ei Kranshi a skor malu. Pero awor, segun Ruthline, hopi hende ta bisa ku e trahadónan ta dunando e trato servisial ku sonrisa riba nan kara.
No tabata sorpresa....
Ruthline a splika Djasabra ku resultado di e enkuesta no tabata un sorpresa pa nan. I sin ke broma, el a bisa ku nan a haña diferente reakshon di hendenan kontentu ku e servisio. I p’esei nan mes a hasi aña pasa un Nulmeeting pa ku e servisio na bali i einan a sali na kla ku nan a skor basta haltu. Un 7,5 pa un servisio di gobièrnu tabata hopi bon komparando ku un rapòrt anterior.
E servisio mas drùk...
Ruthline nan tin servisionan ku ta traha a base di sita i e sitanan por ehèmpel pa sédula ta yega te asta 160 persona pa dia ku nan ta atendé. Na di dos lugá pa pasport tin 110 persona pa dia ku ta presentá einan. na 2010 ora a hasi kranshi asuntunan públiko a pone reibeweis aserka i e servisio aki tambe ta traha a base di sita aktualmente. E servisio di reibeweis tambe ta kanando masha bon mes, kaminda ta atendé den kareda di 144 sita pa dia. Mas aleu tin otro servisionan manera uitreksel, verklaring ku hendenan ta bin tuma i tin tambe inschrijving, geboorte, sterfte, dunamentu di man, verhuizing. Remarkabel ta ku tin mas òf ménos 50 kasamentu pa luna. El a baha si kompará ku añanan anterior, asina Ruthline a splika. El a bisa ku mayoria kasamentu ta desèmber òf tambe riba sierto fecha nan memorabel i apart. E otro servisio ku kranshi ta duna ta deklarashon di stamboom. Tin biaha esaki por dura ya ku tin petishonnan ta bai for di aña 17 i 18 piku. I no tur biaha Kranshi por duna e informashonnan ei. Nan ta bezig ta wak te ki aña nan por duna e informashonnan ei. Banda di esei nan no tabata ekipá pa atendé ku deklarashon di stamboom, ya ku ta algu basta nobo di último 5 pa 6 aña. Ta ora notarionan a kuminsá hasi e petishon di deklarashon di stamboom pa herederonan, esakinan tabata bai Kranshi i asina Kranshi mester a kuminsá duna e servisio ei tambe. Kranshi no ta prepará ku sufisiente trahadó pa esei pero ta bezig pa wak kon ta drecha e servisio ei.
Orguyoso.....
Ruthline a sigui bisa ku otro servisio ku nan tin di drecha ta e tempu di espera pa traha sita pa pasport. Ora haña e sita bo ta wòrdu yuda mesora. Den kaso di pasport por ehèmpel tin e situashon ku tin biaha hende ta traha sita pero no ta presentá. Esaki ta stroba pa otro hende ku si mester di sita por yega mas lihé na un bùrt. I p’esei ta pidi pa si bo no ta bai un sita, pa avisá Kranshi mesora i asina por habri fecha nan pa otro hendenan. E direktora interino a bisa mas aleu ku Kranshi a hasi hopi kambio riba e parti di prosesonan ku nan tin. Kranshi a sòru pa hopi entrenamentu pa su personal kual a kontribuí ku awe orguyosamente nan por ta orguyoso di e resultado di enkuesta.
Kontrol nashonalidat...
Ruthline a splika na Djasabra ku nan no sa haña keho ku eksepshon di e kontròl di nashonalidat. Den e parti aki e hende no ta keda kontentu ku e resultado òf desishon tumá i pa nan e ta bira un keho. Kranshi ta hala aden pasport di hende pero esei ta basá riba kontròl di kosnan ku a sosodé 30 i 40 aña pasá kaminda a mira bèk ku e hende ei no tabatin derechi di ta un ulandes i esei Kranshi ta koregí i esei ta netamente loke e hende no ta keda kontentu kuné.
Mas servisio online...
Sra. Haddocks a bisa ku nan ta konsiente ku tin mas pa drecha pero tambe nan tin mas servisio ku nan ke modernisá i bai por ehèmpel e sistema di online. E direktora interino a menshoná komo ehèmpel servisio di mudansa ku e hende por hasié na su kas sinta. Meskos ku uitreksel por hasi e petishon online, page online i Kranshi por pòst esaki òf ta bai tum’e. E ta spera ku pa otro aña mes e proyektonan ei ta kla pa asina yuda ku e kantidat di kliente ku Kranshi ta haña diariamente ku ta alrededor di 900, por bah’e i duna e servisio ku por keda hasí na kas mes.
Nan lo bai traha ku e sistema di Backoffice esta ménos personal na bali pero patras ta traha riba petishonnan ku e kliente ta hasi online.
Na nòmber di nan tur di Kranshi e ta yama danki na pueblo, danki na e krítikanan ku ta yuda tene nan bei i kiko mester mehora aun mas. “I no ta ami so a hasié pero ta nos tur”, Ruthline Haddocks a terminá bisando.
Ombudsman di Kòrsou a finalisá un enkuesta pa evaluá kon komunidat ta eksperensia servisio di gobièrnu. Den e enkuesta aki, a hasi diesun (11) pregunta ku tin di aber ku diferente aspekto di e servisio ku e siudadano ta risibí, manera aksesibilidat telefóniko di e aparato gubernamental i durashon di atendementu ku petishonnan. E resultado di e enkuesta ta duna informashon balioso pa por sigui traha di un manera dirigí riba e servisio di gobièrnu.
Laga un komentario