WILLEMSTAD.- E kredensial di e miembronan nobo di parlamento ku lo tuma asiento 11 mei awor a yega parlamento. Den e nòmbernan ku Konseho Elektoral a manda pa parlamento no tin sorpresa apesar di bastante konmoshon ku resultado di elekshon di 19 mart a kousa den seno di prinsipalmente partidonan ku a ‘pèrdè’ elekshon.

E nuebe parlamentarionan pa partido MFK lo ta, Gilmar “Pik” Pisas, Charles Cooper, Eduard Braam, Charetti America-Francisca, Javier Silvania, Gilbert Doran, Juniel Carolina, Fergino Brownbill i Maria Nita. Pa partido Nashonal lo drenta parlamento, Ruthmilda Larmonie-Cecilia, Ornelio “Kid” Martina, Gwendell Mercelina i Sheldry Osepa. Mirando ku e dos partidonan aki ta negoshando un akuerdo i programa di gobernashon pa un gobièrnu nobo por spera ku unabes ku e gobièrnu ta kla ku vários di e parlamentarionan aki lo tuma nan retiro atrobe pa asumí un funshon di minister.

Pa partido PAR lo drenta parlamento Eugene Rhuggenaath, Quincy Girigorie, Zita Jesus-Leito i Ana Maria Pauletta. Pa partido MAN Steven Martina i Giselle Mc William lo bira e parlamentarionan pa e próksimo periodo di gobernashon. Michelano “Lo” Martines pa partido KEM i Rennox Calmes pa partido Trabou pa Kòrsou tambe lo tuma asiento den parlamento ku lo konsistí pues di un total di 6 frakshon.

Den edishon imprimi di EXTRA mayan lo tin un relato mas amplio.