WILLEMSTAD.- Curaçao Airport Partners (CAP), den kolaborashon ku Curaçaose Wegenbouw Maatschappij (CWM), un di su shareholders esensial, a marka un logro importante ku e “groundbreaking” pa desaroyá un “halt” pa bùs na Aeropuerto Internashonal di Kòrsou (CUR). E desaroyo aki ta un parti esensial di e esfuersonan kontinuo di CAP pa mehorá e infrastruktura di e aeropuerto i optimalisá e eksperensiá di pasahero, manera parti di un inisiativa mas amplio pa rediseñá i mehorá e fasilidatnan di parkeo.
E proyekto ta bin komo un reakshon na e situashon ku a surgi inesperá di kantidat di pasahero durante e aña pasá, ku a superá tur pronóstikonan inisial. E kresementu rápido a kousa un gran kongestionamentu na e área di buska pasahero, debí na e kantidat di bùsnan di tour ku a subi. Pa enfrentá esakinan i prepará pa kresementu kontinuo, ekipo di CAP mes a rediseñá e áreanan di parking, i den kolaborashon ku CWM, ta krea un “halt” spesífiko pa bùsnan di tour den e parkeo. E área nobo lo yuda pa dirigí tráfiko i mehorá e eksperensia di pasahero. CEO di CAP, Jonny Andersen, a enfatisá e importansia di e proyekto den su remarkenan: “Nos aeropuerto a eksperensiá un kresementu inkreibel den e luna-nan pasá, i ku esaki a bira un nesesidat pa mehoransa stratégiko di infrastruktura. E “halt” nobo pa bùsnan di tour ta un di hopi paso ku a tuma pa mehorá e eksperensia di pasahero, spesialmente ora ta prepará pa e temporada pik ku ta bin mas lat. E proyekto aki ta demostrá kon pa partnershipnan manera esun ku CWM ta esensial. Ora traha huntu i kere den e kapasidat di otro, por logra kosnan mas grandi pa aeropuerto i pa Kòrsou mes. “Nos ta orguyoso di traha huntu ku CWM riba esaki, ku ta krusial pa sigurá ku Aeropuerto Internashonal di Kòrsou kontinuo sirbi komo un porta di entrada akohedór i efisiente pa nos isla.”
E konstrukshon di e “halt” lo ta kla pa desèmber 2024, tempu pa e temporada drùk di biahe. E proyekto lo yuda dirigí e tráfiko, redusí kongestionamentu, i mehorá e eksperensia general pa pasaheronan, operadornan di bùs, i bishitantenan di “nos “isla.