WILLEMSTAD.- E reunion di koperativa di kriadónan di bestia, KriaTur a kontinuá djaweps anochi den sala di reunion di AVB (“Agrarisch en Visserijbeheer”, ántes LVV). Presidente di KriaTur, Erick Curial ta bisa ku e reunion tabata bon bishitá i ku miembronan a bai di akuerdo ku e plan di e koperativa pa trese mehorashon pa e sektor primario na Kòrsou ku ta konsistí di kunukeronan, kriadónan di bestia i piskadónan.

E siguiente paso ta ku otro siman lo entregá e plan na e ministernan responsabel i pa huntu ku trahadónan di e Ministerio di GMN sigui desaroyá e proposishonnan di KriaTur den un plan nashonal pa Kòrsou. Curial ta bisa ku e meta ta pa yega na un plan integral na bienestar di Kòrsou ku ta lidia konkretamente na mas i mihó produkshon di produktonan di alimentashon lokal.

Tambe KriaTur huntu ku gobièrnu ta bai organisá un kumbre dia 18 mei. “Di aworakí pa 18 mei KriaTur ta bai vigilá kiko tur ta bai logra a base di e puntonan ku ta bin dilanti den e plan”, Curial ta bisa.

Ta bisto ku KriaTur ta kana nan propio kaminda lòs for di e Union di koperativanan di agrikultura, krio di bestia i peska (A.K.P.). Curial ta bisa ku e plan ku a traha ta plan di KriaTur i no ta aseptá ku otronan ta trapa riba brek i wanta e proseso.

“Ta pa basta luna kaba KriaTur ta kana e proseso pa a yega na un plan na benefisio di e sektor agrario (krio di bestia i kunukeronan) i peska. Durante di un di e reunionnan a bini proposishon pa envolví otro koperativanan i nos a bai di akuerdo pa kompartí informashon”, Curial ta bisa.

Pero, segun Curial ora a envolví otronan a kuminsá eksigí ku ta para e proseso pa kuminsá di nobo, loke no tabata aseptabel pa KriaTur. E diferensianan di opinion a yega nan kulminashon siman pasá djasabra, 2 dia promé ku e reunion yamá pa djaluna último kaminda miembronan di tur e koperativanan ku a uni den A.K.P. mester a ratifiká e plan.

Curial ta bisa ku el a haña un mensahe 1’or di mardugá ku sierto koperativa ta reklamá ku ainda nan no a haña e dokumento adaptá manera a kumbiní e siman promé, loke na su opinion no ta bèrdat pasobra KriaTur a duna tur informashon. Tambe a bini proposishonnan pa laga personanan di afó wak e plan promé ku aprob’é i te asta a pidi pa tradusí e plan na Hulandes.

Tur e diskushonnan aki tabatin komo konsekuensia ku a surgi un tardansa di mas ku 1 luna, esta Curial. Konsekuentemente e reunion di djaluna 15 aprel a para i KriaTur a disidí di yama su propio reunion di djaweps último pa dal bai ku loke Curial ta bisa e koperativa a inisiá kuné.

Di parti di A.K.P. manera EXTRA a informá resientemente, a manda karta pa KriaTur ku petishon pa nan para nan reunion di djaweps i a sigui kana huntu den e proseso pa presentá un plan integral pa e sektor primario na gobièrnu. “Nan a asta manda karta pa AVB pa e reunion di nos no sigui; imaginá bo kon leu nan a bai.”

A.P.K. ta planiá pa den e siman benidero yama e reunion atrobe ku tur miembro di e koperativanan pa nan tambe kana un trayekto separá di KriaTur pa entregá praktikamente e mesun plan na gobièrnu.