WILLEMSTAD.- Awe alrededor di 3.30 di mardugá polisnan a bai ku urgensia den Saliña na kaya C. Winkel na altura di Lucky Cosmetics pa atendé ku un kaso di tiramentu.

Na yegada di e promé unidat nan a topa ku un dama drumi abou den un situashon krítiko. Mesora a pidi presensia di ambulans pero na nan yegada lamentablemente no por a hasi nada mas pa e víktima. Dòkter di polis a presentá na e sitio I a konstatá morto di e dama víktima (S.R 32 Aña)

Sigun informashon ku nos di EXTRA a kompilá for di testigunan ku tabata na e sitio, un hòmber a yega para dilanti di e víktima I a lòs tiru dirigí riba dje. Na momentu ku e víktima a kai abou e tipo aki lo a lòs algun tiru mas riba e víktima. Tin indikashon ku e dama a risibí mas ku 6 bala parti ariba di su kurpa. Despues di su akto e hòmber sospechoso a kore bai den direkshon di Lindberghweg na pia I durante di su huida el a benta e arma riba dak di un edifisio den serkania.

Algun dia pasa e hòmber lo a tira riba e víktima kaba, pero na e okashon ei ningun persona a sali heridá. Tur kos ta indiká ku ta trata aki di un problema relashonal ku bin terminá ku konsekuensia fatal.

Sigun informashon ku nos ta disponé di dje, ta ku e dama víktima a yega di pone vários denunsia kontra di e hòmber aki. Polisnan lo sigui ku mas investigashon den e kaso aki.