Kenley Jansen (Atlanta Braves) un biaha mas tin ku tuma algun dia di sosiegu i prekoushon pa motibu di batimentu iregular di kurason. Atlanta Braves ayera a anunsiá di a pone Kenley riba lista di hungadónan leshoná i esei pa motibu dje echo ku su kurason ta bati di manera iregular.

Kenley Jansen, di 34 aña, ta den su promé temporada ku Braves despues di a firma komo agente liber den wenter. Den 32 aparishon te ku djaluna último, el a kompilá un ERA di 3.58 ku 5.88 ‘strikeout-to-walk ratio’ ademas di 20 wega salbá den 24 oportunidat.

E picher den novèmber di 2018 a eksperensiá un situashon iregular na kurason durante di un ‘road trip’ na Denver. Den 2012 tabata nesesario pa hasi intervenshon médiko pa motibu di un kondishon na kurason.

“M’a siña hopi relashoná ku kurason”, Jansen  a bisa e tempu ei den esfuerso pa promové konsientisashon riba asuntunan di kurason. “Loke mi mester hasi ta di pèrkurá pa mi preshon di sanger keda’bou. Si mi preshon di sanger subi demasiado esei por kousa un otro situashon fèrfelu. Preshon di sanger haltu ta pone ku e kurason mester traha mas duru. Nos mester kuida nos kurpa, spesialmente nos kurason. Ta un so bo tin”, segun e picher yu di Kòrsou a duna di konosé

Xander Bogaerts (Boston Red Sox) a bai di 4-1 ayera ku un kareda anotá i un base por bola risibí. El a konektá su di 21 doblete di temporada

Jurickson Profar (San Diego Padres) a bai di 4-1 ayera ku un kareda anotá i un base por bola risibí

Didi Gregorius (Philadelphia Phillies) a bai di 3-1 ayera ku un kareda anotá i un base por bola risibí. El a konektá su di 3 tripel di temporada

Jonathan Schoop (Detroit Tigers) a bai di 4-0 ayera

Andrelton Simmons (Chicago Cubs) no a mira akshon ayera

Ozhaino Albies (Atlanta Braves) Ozzie Albies a sufri un fraktura na su pia robes i lo keda pa 2 luna for di akshon