Jurickson Profar (San Diego Padres) djasabra a eliminá e ekipo faborito den Liga Nashonal, Los Angeles Dodgers ganando e seri di mihó di 5, 3-1. Den e wega di djasabra Profar a bai di 3-1 ku un kareda anotá i un base por bola risibí. Awor Padres lo bai topa e ekipo di Philadelphia Phillies kuminsando djamars awor pa 8:03 pm

Hensley Meulens (New York Yankees) a logra empatá e seri di mihó di 5 na 2-2 ayera i forsa un wega desisivo awe nochi pa 7:07 na New York

Kenley Jansen (Atlanta Braves) temporada a terminá djasabra ora ku Braves a pèrdè e seri ku Phillies 3-1

Ozhaino Albies (Atlanta Braves) speransa di por a hunga den post-temporada 2022 a bai pèrdí ora ku Braves a keda eliminá pa Phillies djasabra

Xander Bogaerts (Boston Red Sox) temporada a finalisá

Jonathan Schoop (Detroit Tigers) temporada a finalisá

Chadwick Tromp (Atlanta Braves) temporada a finalisá

Didi Gregorius (Philadelphia Phillies) temporada a finalisá

Andrelton Simmons (Chicago Cubs/Marchena Braves) e temporada aki a kumpli 10 aña di servisio den Liga Grandi. For di prinsipio di temporada Simmons a leshoná i esaki a persiguí e shortstop yu di Kòrsou i djei no a kue su forma mas. Na ougùstùs e organisashon di Chicago Cubs a disidí pa kòrta nan laso ku e pelotero i asina Simmons en prinsipio a bira un agente liber. El a opta pa sinta sobra di temporada afó pa asina sosegá e leshon na su skouder. Na sèptèmber el a opta tòg pa hunga ku e ekipo lokal Marchena Braves den beisbòl Doble A. Simmons su sifranan tabata hopi limitá den 2022 mirando ku e no a mira muchu akshon. Kumpliendo 10 aña di servisio ta importante ya ku asina su penshun kompleto di Liga Grandi ta sigurá. Sifranan final:
G: 35; AB: 75; R: 8; H: 13; 2B: 1; 3B: 0; HR:0; RBI: 7; BB: 7; SO: 13; SB: 4; AVG: .173