Jurickson Profar (San Diego Padres) ayera no ta e bate òf e wante di Profar ku a hala atenshon sino un hungada den leftfield ku a kousa un pida kontroversia ku su kompañeronan di ekipo i poko frustrashon serka e picher. Tabata un bataso ku a pasa riba Profar su kabes ku tabata un doblete pero Profar a keda tarda ku e bala i e bateadó a logra yega te tersera. Lokual a hala mas atenshon di e hungada ta parse ku Profar ta indiká na e koredor pa e purba su suerte bai tersera lokual e hungadó kontrali ta hasi i ta yega safe. “Mi mester a tira e bala den kuadro mas lihé. Mi a hasi un fayo mental. Lokual a pasa a pasa i mi ta asumí tur responsabilidat. Esaki lo no pasa mas,” asina e pelotero yu di Kòrsou a bisa prensa despues di wega. Su manager Bob Melvin no ta kere ku Profar a indiká na e koredor pa purba su suerte pero mas bien tabata indiká na su kompañero di ekipo pa para na e posishon korekto pa e por tira e bala pe. Lokual nan ta yama den beisbòl komo e posishon di ‘cutoff’. Despues den dugout por a mira Manny Machado, Juan Soto i e picher Musgrove papiando ku Profar. Segun Soto anan tabata djis dunando Profar sosten. Pa loke ta e wega mes ayera Profar a bai di 4-0

Jonathan Schoop (Detroit Tigers) a bai di 5-2 ayera ku dos kareda anota i un empuha. El a koneksta su di 9 honron di tempoarda

Xander Bogaerts (Boston Red Sox) no tabatin wega ayera

Kenley Jansen (Atlanta Braves) no a mira akshon ayera

Chadwick Tromp (Atlanta Braves) no a mira akshon ayera

Andrelton Simmons (Chicago Cubs) a keda pone Andrelton Simmons na disposishon di otro ekiponan. Esei ta nifiká ku otro ekiponan di Liga Grandi tin 10 dia pa tuma su kontrakt over di Cubs. Si esaki no pasa Simmons lo por bai Liga Menor òf opta pa bira agente liber. Simmons a indiká kaba ku e lo no hunga mas e temporada aki i konsentrá pa rekuperá di tur su leshonnan

Ozhaino Albies (Atlanta Braves) Ozzie Albies a sufri un fraktura na su pia robes i lo keda pa for di akshon pa un periodo largu. Speransa ta ku e lo por ta bek pa fin di ougùstùs òf prinsipio di sèptèmber. E siman aki e lo kuminsá fangu bala tiki tiki pero ainda no por hasi nan pa ku bateo

Didi Gregorius (Philadelphia Phillies) a keda laga den libertat ayera. Pendiente awor si un otro ekipo ta yama pa ofresé un oportunidat nobo

Play of the Day