WILLEMSTAD.- Segun un rapòrt di diferente servisio di inteligensia di Hulanda e krísis di Venezuela ta mas grandi ku Venezuela mes. Esei ta nifiká ku e krísis ta afektá henter e region, inkluí Kòrsou, Aruba i Boneiru.
Banda di esei ‘interesnan geopolítiko’ di Merka, Rusia i China ta forma parti di henter e situashon. Segun esaki por yega na un midimentu di forsa den region di Karibe entre e paisnan grandi. I ku esaki por tin influensia pa e paisnan i islanan di Reino Hulandes den Karibe.
Banda di esei, segun e rapòrt ‘Dreigingsbeeld Statelijke Actoren’ Venezuela konosé un situashon na unda kriminalidat organisá i militarnan huntu ta enbolbí ku negoshi ilegal di droga, oro i arma.
Segun e rapòrt esaki tin su efekto di perturbá i destablisashon den region.
Ku e rapòrt Hulanda ke analisá diferente peliger potensial rònt mundu. E rapòrt tin mas ku 30 página. Situashon na Venezuela – i e posibel peliger pa paisnan i islanan di Reino Hulandes den Karibe – no ta mas ku un (1) página. Ku ta nifiká ku Hulanda ta na altura di e situashon peligroso na banda di frontera di Reino Hulandes. Pero na mesun momentu ta realisá ku tin hopi otro situashon peligroso na mundu.
E rapòrt a keda entregá e siman aki na parlamento hulandes dor di ministernan di Hustisia, Defensa i Relashon Interno di Hulanda.