WILLEMSTAD.- Despues di registrashon e diferente organisashonnan di bario a kuminsá ku repartishon di e karchinan di yudansa sosial. Krus Kora Kòrsou den e di dos fase di e yudansa humanitario a sera akuerdo ku organisashonnan di bario pa di e forma aki e yudansa por yega na esnan ku realmente ta den nesesidat.

Tin organisashonnan di bario ku a uni forsa, loke ta di aploudí, pa fasilitá e proseso di entrega di e karchinan sosial. E proseso di distribushon di e karchinan a start.

Mester tene kuenta ku e pandemia di Covid i pa e motibu ei Krus Kora huntu ku organisashonnan di bario ta hasi un supliká grandi na tur hende ku ta bin na remarke pa haña un karchi di yudansa sosial pa por fabor keda pendiente di e organisashon di bario unda el a registrá pa sa na ki momentu i ki dia ta hasi e repartishon di e karchinan aki. Distansiamentu sosial i otro reglanan relashoná ku Covid ta importante i mester tene kuenta ku nan. No por forma aglomerashon pasobra e riesgonan ta haltu pa boluntarionan di Krus Kora, e organisashonnan di bario i pa e siudadanonan mes.