WILLEMSTAD.- Ayera for di den oranan di dia, Krus Kòrá a alertá tur su miembronan i mesora a aktivá i a reuní den su seno relashoná ku e último desaroyonan di Tormenta Tropikal Brett. Mas den oranan di anochi a yama tur miembro i na mes momentu a inisiá ku tur preparashon pa ku posibel akshonnan ku lo mester tuma.

Tambe a duna indikashon kua ta tur e shèlternan ku lo ta aktivo durante e temporada aki. Komandante suplente di Krus Kòrá Kòrsou a indiká ku ta hopi importante pa siudadanonan mes hasi tur e preparashonnan i tuma tur e prekoushonnan nesesario.

Krus Kòrá ta hasi un apelashon importante pa tur dunadó di trabou ku tin empleado ku ta miembro di Krus Kòrá Kòrsou, pa tene na kuenta ku tur miembro di Krus Kòrá Kòrsou lo wòrdu yama den kaso di kalamidat pa duna asistensia na komunidat. Esaki naturalmente despues ku nan propio kas i famia ta sigur.  Awe parti anochi lo bolbe reuní pa tuma desishon kua ta e paso ku lo bai tuma.

Riba rednan sosial i tambe via di diferente medionan di komunikashon lo tene komunidat informá kon ta e mihó manera pa ta prepará pa kualke eventualidat ku lo por presentá.