WILLEMSTAD.- Ayera riba un fecha masha bunita, dia di hende muhé, Krus Kòrá Kòrsou a keda rekonosé pa Women’s Steering Commitee komo e organisashon sobresaliente. Ayera Women’s Steering Commitee a tene un Santu Sakrifisio di Misa na Misa di Steenrijk kaminda a rekonosé Krus Kòrá i tambe a para ketu riba e dia importante aki.

E aña aki Krus Kòrá ta selebrá su di 90 aniversario despues di un aña hopi duru tras di lomba pa e organisashon. Na luna di mei aña pasa un kandela feros a destruí e edifisio di Krus Kòrá Suffisant. Henter e organisashon a yora huntu pero despues di un siman tur hende tabata riba pia bek kumpliendo ku e komunidat ku tin mas mester. Esaki no solamente na Kòrsou pero tambe internashonalmente p.e den kaso di desaster. Tur esaki huntu ku tur nan miembronan hende muhé tambe.

Tambe Women’s Steering Commitee a para ketu riba e echo ku tin hende muhénan fuerte i balente na puestonan importante den nos komunidat den tur tipo di rango.

Na final di e Santu Sakrifisio di Misa Presidente di Women’s Steering Commitee i tambe Minister di Desaroyo Sosial, Labor i Bienestar sr. Hensley Koeiman a dirigí algun palabra sigui pa e rekonosementu ofisial na Krus Kòrá Kòrsou ku entrega di un plaka di mérito.

Despues Krus Kòrá a hasi entrega di vários pakete di komestibel, higiena di pakete di beibi pa asina Misa mes entrega esakinan pa famianan ku mas mester.