WILLEMSTAD.- Konseho Supremo Elektoral (KSE) djaluna último a reuní na WTC. E konseho tabatin un reunion públiko pa disidí riba balides di listanan di kandidato i mantenementu di e kandidato riba e listanan. Durante e reunion públiko Konseho Supremo Elektoral a tuma desishon riba dos prosèsverbal pa asina entre otro stipulá resultado di elekshon di sostenementu di listanan, Esaki a tuma lugá dia 30 i 31 di yanüari. E resultado ku KSE a akordá djaluna último no ta hopi diferente for di e resultadonan preliminar ku a wòrdu presentá djadumingu 31 di yanüari den oranan di anochi. Ku ta nifiká ku ocho partidonan nobo por partisipá den e elekshon pa un parlamento nobo pa Kòrsou dia 19 di mart. E siguiente partidonan a haña sufisiente voto durante sostenementu di e listanan: Trabou pa Kòrsou (ku 2216 voto), Un Kambio pa Kòrsou (1514), KUMUN (942), KEM – Kòrsou Esun Mihó (2686), PNP (3374), Movementu Kousa Promé (1285), Partido Democraat (1492) i Vishon (1303).

Durante e wikènt di 30 i 31 di yanüari den total 19220 persona a haña un papel di vota den un di e 14 urna. Seis papel a wòrdu restituí pa motibu ku nan nan no por usa mas. Banda di esei 29 papel di vota tabata blanko. Den urna na St. Antonius Collega kasi 50 porshento di e papel di vota blanko a wòrdu integrá: 24. Banda di esei den total 587 papel di vota tabata inválido. Ku ta nifiká ku e total di vota válido na final di e dos dianan tabata 18.598.
Manera ta konosé esaki ta un kantidat hopi haltu. Den 2016 e kantidat di hende ku a vota durante sostenementu di lista tabata mas o ménos 12.000. Te e aña aki nunka mas hende a partisipá den un sostenementu di vota.
Pa e motibu Konseho Supremo Elektoral a bestèl 20.000 pòtlot kòrá pa e aña aki. Nan a ferwagt ku esaki lo tabata mas ku sufisiente.
KSE djaluna último tambe a konfirmá ku shete partido, ku den aña 2017 a keda skohé den parlamento di Kòrsou, por partisipá den próksimo elekshon. KSE a kontrolá balides di listanan di kandidato i mantenementu di e kandidatonan riba e listanan. Ku ta: PAR, PIN, MAN, MFK, Movementu Progresivo, Kòrsou di Nos Tur i Pueblo Soberano, ku ta nifiká ku 15 partido lo partisipá den e elekshon. Djasabra awor KSE lo reuní ku representantenan di e 15 partido. Durante e reunion lo disidí kua number tur partido ta haña riba lista di votashon.