WILLEMSTAD.- Nombramentu di un representante di pueblo nobo atrobe ta mustra di ta un problema pa partido PAR. No solamente parlamentarionan ku ta opstruí demokrasia ta anunsiá di lo bòikòt e proseso pa un kolega drenta parlamento i hasi su trabou a base di resultado di elekshon 2017, pero un biaha mas den seno di PAR mes tin insertidumbre riba e proseso ku mester kana.

Meskos ku tabata e kaso momento ku Shaheen Elhage a drenta parlamento atrobe PAR ta dal den mesun problema awor ku Emmilou Capriles ke drenta. PAR ta pendiente kiko number 3 riba lista, Marilyn Alcalá-Wallé ta hasi. E eks minister pa PAR ketu bai ta ofisialmente un sospechoso den un investigashon di Ministerio Públiko a base di kehonan entregá riba violashon ku e lei di screening.

Segun EXTRA a komprondé Konseho Supremo Elektoral (KSE) a manda djabièrnè 15 yanüari un karta pa Alacalá-Wallé ku e tin 8 dia di tempu pa reakshoná ariba i indiká si e ta deseá di drenta parlamento òf laga. PAR mester nombra un otro kandidato pa drenta parlamento despues ku e partido a pidi Jeser El Ayoubi pa entregá su asiento. El Ayoubi no ta bai elekshon ku PAR dia 19 mart awor i konsekuentemente a pone su asiento na disposishon di partido.

PAR su kandidato pa drenta parlamento ta Emmilou Capriles ku ta number 11 riba lista. Pero promé ku Emmilou por drenta parlamento tur esnan ku ta promé kuné riba lista mester indiká ku nan no ta interesá den e puesto. Den e personanan aki number 3 riba lista, Alacalé-Wallé por disidí ku e ta asumí e funshon mirando ku e investigashon kontra su persona no ta strob’é drenta parlamento.

Momento ku PAR i KSE kaba di resolvé e asuntu aki mester atendé atrobe ku parlamentarionan ku ta nenga di ‘koperá’ pa un representante di pueblo por hasi su trabou. Dia ku Elhage a drenta mester a hiba un kaso te den korte pa asina por a nombra su persona.

Ekspertonan di leinan estatal ku EXTRA a papia kuné un biaha mas ta indiká ku nunka e legisladó por a pensa ku un dia lo a yega asina leu ku representantenan di pueblo ta opstruí funshonamentu di e órgano demokrátiko mas haltu di pais dor di deliberadamente strob’e un kandidato ku a partisipá na un elekshon liber drenta parlamento. Un desaroyo sumamente preokupante ku ta lanta hopi duda te kon leu ta bai ku e tipo di práktikanan aki.

Por asta pensa riba situashonnan ku den futuro un mayoria den parlamento ta bai disidí ta kua kandidato por drenta parlamento òf laga. Pa e motibu aki tambe por tende gritunan pa trese kambio den leinan estatal kaminda ta sanshoná parlamentarionan ku deliberadamente ta blòkia e proseso demokrátiko i stroba pa un kandidato drenta parlamento.