KEM ta boga pa mas informashon

WILLEMSTAD.- Faltando algu mas ku 4 luna pa sera e registro di votadó pa elekshon di 21 mart 2025, ainda e Konseho Supremo Elektoral (KSE) no ta disponé di tur 7 miembro manera lei ta preskribí. Na febrüari 2024 a nombra 3 miembro regular pa un periodo di 6 aña i falta pa nombra 4 miembro mas.

Pa minister di Maneho di Gobernashon, Planifikashon i Servisio Públiko (BPD) por formalisá nombramentu di e kandidatonan e komishon di nombramentu skohe un kandidato ku a solisitá, SBTNO mester duna konseho i e kandidato mester pasa investigashon di seguridat (screening) pa hefe di VDC duna un deklarashon di no opheshon.

Riba preguntanan ku partido KEM a hasi relashoná ku relato anual 2023 di KSE ta bini mas aleu dilanti ku e derechi di voto ta konta pa tur siudadano ku un nashonalidat Hulandes, tin 18 aña bai ariba riba dia di elekshon i ta inskribí na Kòrsou. Manera menshoná ta sera e registro di votadó 24 di desèmber 2024.

Entrega di lista di kandidato pa partidonan polítiko òf polítikonan ku ta aspirá pa partisipá na elekshon ta 23 yanüari 2025. E entrega di lista lo tuma lugá na ofisina di Konseho Supremo Elektoral na Scharlooweg 11.

Sostenementu di lista pa partidonan ku aktualmente no tin representashon den parlamento lo tuma lugá dianan 1 i 2 febrüari 2025. E partidonan aki mester haña un sosten di mínimo 848 voto. Elekshon pa miembronan di parlamento ta tuma lugá dia 21 mart 2025.

Relashoná ku e lokalidat nobo di KSE ta informá ku debí na oumento di hür na WTC kaminda tabatin ofisina for di 2021, a kuminsá deliberá na 2022 pa buska un lokalidat nobo. Ounke ku e kontrato di hür na WTC ta terminá na 2025, KSE no ta hañ’é prudente pa muda den temporada di elekshon i pa e motibu aki entrante promé di aprel 2024 KSE a muda pa Scharlooweg 11.

“Mudansa di KSE pa un lokalidat sentral, espasioso, efisiente, aksesibel pa públiko i ta kumpli ku e kriterionan nesesario pa por ehersé nos trabou huntu ku posibilidat pa usa e mesun edifisio di forma optimal pa elekshon, ta na benefisio di KSE i henter komunidat. Ku e lokalidat aki KSE por duna mas i mihó servisio  na siudadanonan di Kòrsou”, ta sigui skibi den e kontestanan.

Partido KEM ta indiká ku tin sierto informashon ku a pidi ku no a risibí. Ta trata di presupuesto di KSE, kontrato di hür pa e edifisio nobo i un kalkulashon den diferensiá den gastu di hür kompará ku WTC. E partido ta pidi e informashonnan aki pa asina tin tur transparensia rondó di KSE.

Pa e motibu aki ta bai pidi Minister di BPD si e por manda e informashon risibí. Den presupuesto por haña tambe klaridat riba preguntanan finansiero manera e 2 mion ku a risibí pa organisá elekshon 2025, i suma di 871.900 florin pa kubri gastunan operashonal na 2024 kompará ku 595.400 florin ku a risibí na 2023.

KEM en todo kaso ta satisfecho ku a risibí informashon riba diferente fecha importante pa tene kuenta kuné pa elekshon na 2025 i ta enkurashá KSE pa e ta mas aktivo den duna informashon na komunidat.